ខេត្តសៀមរាប ÷ ប្រជាពលរដ្ឋនៅស្រុកអង្គរជុំចំនួន ៣៤០គ្រួសារ ដែលរងផលប៉ះពាល់ដោយទឹកជំនន់កន្លងមកបានទទួលស្បៀងពីរាជរដ្ឋាភិបាលមានគ្រឿងឧបភោគបរិភោគ ពីគណៈកម្មាធិការគ្រប់គ្រងប្រព័ន្ធស្បៀងកម្ពុជា។ ហើយការផ្ដល់ជូនស្បៀងនេះ ធ្វើឡើងនៅក្នុងវត្តក្រឡាញ់ ឃុំតាសោម ស្រុកអង្គរជុំ ខេត្តសៀមរាប នាព្រឹកថ្ងៃទី២៦ ខែតុលា ឆ្នាំ២០២២ ។
នៅក្នុងឱកាសផ្តល់អំណោយនាពេលនោះដែរ លោក ឃឹម ហ្វី ណង់ អភិបាលរងខេត្តសៀមរាប បានមានប្រសាសន៍ថា ការផ្ដល់ស្បៀងនេះ ជាការយកចិត្ដទុកដាក់ដ៏ខ្ពង់ខ្ពស់របស់សម្តេចអគ្គមហាសេនាបតីតេ ជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលកន្លងមក ប្រមុខរាជរដ្ឋាភិបាលតែងតែបានគិតគូរ និងបានឧបត្ថម្ភគាំទ្រជាបន្តបន្ទាប់ដល់ប្រជាពលរដ្ឋដែលរងផលប៉ះពាល់ពីគ្រោះមហន្តរាយផ្សេងៗជាដើម។ លោក បន្តថា ការផ្តល់ស្បៀងនាពេលនេះគឺ ជាការបង្ហាញឲ្យឃើញពីការយកចិត្ដទុកដាក់ពីរាជរដ្ឋាភិបាលចំពោះបងប្អូនដែលបានរងនូវ ផលបះពាល់ពីគ្រោះមហន្តរាយដោយសារទឹកជំនន់នោះ។ ហើយការបះពាល់ទាំងនេះ មិនមែនមានតែស្រុកអង្គរជុំមួយទេ គឺមានស្រុកជាច្រើនដែលរងផល បះពាល់ដូចនេះផងដែរ។ ដូច្នេះបន្ទាប់ពីទឹកបានស្រកជាបណ្តើៗ សូមឲ្យបងប្អូនប្រជាពលរដ្ឋទាំងអស់មេត្តាប្រុងប្រយ័ត្នឲ្យបានខ្ពស់ចំពោះអនាម័យ បរិស្ថាន និងសុខភាពឲ្យបានល្អប្រសើរជៀសវាងការឆ្លងរីករាល ដាលពីជម្ងឺផ្សេងៗដោយប្រការណាមួយជាយថា ហេតុក្នុងការរស់នៅប្រចាំថ្ងៃរបស់យើងជាដើម។
តាមសេចក្តីរាយការណ៍របស់លោក លុក ផុស អភិបាលស្រុកអង្គរជុំ បានអោយដឹងថា ដោយសារជំនន់ទឹកភ្លៀងនៅក្នុងភូមិសាស្រ្ដស្រុកអង្គរជុំកន្លងមកបានធ្វើឲ្យប្រជាពលរដ្ឋរងផលប៉ះពាល់ដោយសារទឹកជំនន់ជន់លិចនោះមានចំនួនជាង ៩០០គ្រួសារ ស្ថិតក្នុងឃុំចំនួន ៣ គឺឃុំតាសោម ឃុំនគរភាស និងឃុំ គោកដូង។ ហើយជាក់ស្តែងនាពេលនេះ ប្រជាពលរដ្ឋដែលបានមកទទួលអំណោយមានចំនួន ៣៤០គ្រួសារ ស្ថិតក្នុងឃុំចំនួន ៣ ខាងលើ ដែលរងផលប៉ះពាល់ខ្លាំងផងដែរ ។
យោងតាមរបាយការណ៍ របស់រដ្ឋបាលខេត្ដសៀមរាប បានបង្ហាញថា គិតចាប់ពីថ្ងៃទី១៧ខែតុលាឆ្នាំ២០២២ នេះ ការបែងចែកស្បៀង និងគ្រឿងឧបភោគ បរិភោគ ដល់ប្រជាពលរដ្ឋមានផលប៉ះពាល់ដោយគ្រោះមហន្ដរាយពីគណៈកម្មការគ្រប់គ្រងប្រព័ន្ធស្បៀងបម្រុងកម្ពុជាមានចំនួនជាង៦ពាន់គ្រួសារ ក្នុងចំណោមប្រជាពលរដ្ឋរងគ្រោះដោយទឹកជំនន់១ម៉ឺន៤៥០គ្រួសារ ក្នុងស្រុកចំនួន៨នៃខេត្ដសៀមរាប៕
ដោយ ÷ ពន្លឺ
