ខេត្តសៀមរាប ÷នាព្រឹកថ្ងៃទី២៥ ខែតុលា ឆ្នាំ២០២២ នេះ នៅក្នុងខេត្តសៀមរាប ក្រសួងការងារ និងបណ្តុះបណ្តាលវិជ្ជាជីវៈ បានបើកសិក្ខាសាលាពិគ្រោះយោបល់បច្ចេកទេសលើសេចក្តីព្រាងច្បាប់ស្តីពីសុវត្ថិភាព និងសុខភាពការងារ ស្ថិត ក្រោមអធិបតីភាពឯកឧត្តម ផេង សុខាំ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ លោក Noh, Min-Ki ប្រធានគ្រប់គ្រងគម្រោងនៃទីភ្នាក់ងារសុវត្ថិភាព និង សុខភាពការងារកូរ៉េ (KOSHA) និងឯកឧត្តម លោក លោកស្រី ថ្នាក់ដឹកនាំក្រសួង នាយកដ្ឋានពាក់ព័ន្ធ និងមន្ទីរ ក្រោមឱវាទនៃក្រសួងការងារ និងបណ្តុះបណ្តាលវិជ្ជាជីវៈ លោក លោកស្រី តំណាងទីភ្នាក់ងារសុខភាព និងសុវត្ថិភាពការងារកូរ៉េ អញ្ជើញចូលរួមផងដែរ។
ឯកឧត្តម ផេង សុខាំ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ការរៀបចំសិក្ខាសាលាពិគ្រោះយោបល់បច្ចេកទេស លើសេចក្តីព្រាងច្បាប់ស្តីពីសុវត្ថិភាព និងសុខភាពការងារនាពេលនេះគឺក្នុងគោលបំណង ដើម្បីផ្ដល់យោបល់ក្នុងការរៀបចំច្បាប់ស្តីពីសុវត្ថិភាព និងសុខភាពការងារសម្រាប់ប្រទេសកម្ពុជា និងស្វែងយល់អំពីប្រព័ន្ធច្បាប់ និង ប្រព័ន្ធគ្រប់គ្រងសុវត្ថិភាព និងសុខភាពការងារនៅសាធារណៈរដ្ឋកូរ៉េ ។ រាជរដ្ឋាភិបាលកម្ពុជាដែលមានសម្ដេចតេជោ ហ៊ុនសែន ជាប្រមុខដឹកនាំដ៏ឈ្លាសវៃ បានយកចិត្តទុកយ៉ាងខ្លាំងក្នុងការគាំពារដល់បងប្អូនកម្មករនិយោជិត តាមរយៈការដាក់ចេញនូវគោលនយោបាយជាបន្តបន្ទាប់ ដើម្បីធានានូវកំណើនការងារ ការបណ្តុះបណ្តាលវិជ្ជាជីវៈ សុវត្ថិភាព និងសុខភាពការងារ ប្រព័ន្ធរបបសន្តិសុខសង្គម សម្រាប់ជនទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ និងការលើកកម្ពស់ជីវភាពរបស់កម្មករនិយោជិត។ ស្របតាមគោលនយោបាយរបស់រដ្ឋាភិបាលកម្ពុជាខាងលើ ក្រសួងការងារនិងបណ្តុះបណ្តាល វិជ្ជាជីវៈបានបន្តអនុវត្តផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ ដំណាក់កាលទី២ ឆ្នាំ២០១៨-២០២២ នៃកម្មវិធីទី៤ ការលើកកម្ពស់សុខភាព និងសុវត្ថិភាព ការងាររបស់ខ្លួន ការរៀបចំគោលនយោបាយ ស្តីពីសុខភាព និងសុវត្ថិភាពការងារ។
ឯកឧត្តម ក៏បានបន្តថា ក្រសួងការងារ បានសម្រេចនូវលទ្ធផលការងារសំខាន់ៗជាបន្តបន្ទាប់រួមមាន១. ការដាក់ចេញនូវផែនការមេលើកទី២ស្តីពីសុវត្ថិភាព និងសុខភាព ការងារឆ្នាំ២០១៨-២០២២។ ២. ការរៀបចំកម្រងព័ត៌មានលើកទី២ ស្តីពីសុវត្ថិភាព និងសុខភាពការងារ និងកម្រងព័ត៌មាន ជាតិស្តីពីសារធាតុអាស បេស្តុសនៅកម្ពុជា។ ៣. ការរៀបចំការដាក់ចេញនូវគោលការណ៍ប្រតិបត្តិស្តង់ដា ស្ដីពីដំណើរការរោងចក្រ សហគ្រាស តាមគន្លងប្រក្រតីភាពថ្មីក្នុងបរិបទនៃជំងឺកូវីដ-១៩ ៤. ការរៀបចំគោលការណ៍ណែនាំស្តីពីសុវត្ថិភាពក្នុងការប្រើប្រាស់សារធាតុគីមីនៅកន្លែងធ្វើការ ៥. ការរៀបចំឯកសារមេរៀនបណ្តុះបណ្តាលស្តីពីការកែលម្អរបៀបធ្វើការសម្រាប់ការដ្ឋានសំណង់អគារខ្ពស់ (WILCON)។ ជាងនេះទៅទៀត ក្រោមកិច្ចសហការ និងគាំទ្រពីទីភ្នាក់ងារសុវត្ថិភាព និងសុខភាពការងារកូរ៉េ និងក្រសួងការងារកូរ៉េ នាយកដ្ឋានពេទ្យការងារ បាននឹងកំពុងអនុវត្តគម្រោងចំនួន ២ រួមមាន ១. ការ រៀបចំច្បាប់ស្តីពីសុវត្ថិភាព និងសុខភាពការងារ ២. ការបង្កើតមជ្ឈមណ្ឌលបណ្តុះបណ្តាលសុវត្ថិភាព និងសុខភាពការងារផងដែរ៕
ដោយ ÷ ពន្លឺ
