ខេត្តសៀមរាប ÷ កាលពីរសៀលថ្ងៃទី២០ខែតុលាឆ្នាំ២០២២ ឯកឧត្តម សុខ ប៊ុនថា រដ្ឋលេខាធិកាក្រសួងសង្គមកិច្ច អតីតយុទ្ធជន និងយុវនីតិសម្បទា និងប្រតិភូក្រុមការងារសហការជាមួយមន្ទីរសង្គមកិច្ច អតីតយុទ្ធជន និងយុវនីតិសម្បទា បាននាំយកអំណោយរាជរដ្ឋាភិបាលកម្ពុជាជាគ្រឿងឧបភោគបរិភោគ ចែកជូនគ្រួសាររងគ្រោះ ងាយរងគ្រោះនិងចាស់ជរាក្រីក្រចំនួន១០០គ្រួសារមកពី៣ឃុំក្នុងចំណោមឃុំទាំង១០របស់ស្រុកក្រឡាញ់ ដែលជួប ផលប៉ះពាល់ដោយជំនន់ទឹកភ្លៀងក្នុងពេលថ្មីៗ ។សម្ភារៈអំណោយក្នុង១គ្រួសារទទួលបាន អង្គរចំនួន ២៥គីឡូក្រាម .មីជាតិ ០១កេះ,ទឹកស៊ីអ៊ីវ ០១យួរ,ទឹកត្រី ០១យួរ,ត្រីខកំប៉ុង ០១យួរ និង ថវិកាចំនួន ២០ ០០០រៀលផងដែរ ។
លោកស្រី ម៉ននី រង្សី អភិបាលរងខេត្តសៀមរាប បានមានប្រសាសន៍ថា៖ក្នុងអំឡុងខែកញ្ញានិងខែតុលាឆ្នាំ២០២២នេះ ដោយសារដោយមានភ្លៀងធ្លាក់ជាហូរហែ និងមានទឹកហូរមកពីខេត្តជិតខាងផង បាន បណ្តាលឱ្យមានជំនន់ទឹកភ្លៀង ប៉ះពាលដល់ស្រុកចំនួន៩ក្នុងចំណោម១២ក្រុងស្រុករបស់ខេត្ត រួមមានស្រុកស្រីស្នំ ក្រឡាញ់អង្គរជុំ វ៉ារិន សូទ្រនិគម ប្រាសាទបាគង ពួក អង្គរធំនិងស្រុកជីក្រែងខេត្តសៀមរាបបានជួបប៉ះពាល់ទៅលើលំនៅឋាន ដំណាំស្រូវ និងហេដ្ឋារចនាសម្ព័ន្ឋនានា ក្នុងមូលដ្ឋានជាច្រើនទៀតផង ហើយស្រុកដែលប៉ះពាល់ធ្ងន់ធ្ងរនិងយូរថ្ងៃជាងគឺគឺស្រុកស្រីស្នំនិងស្រុកក្រឡាញ់។
ក្នុងឱកាសនោះដែរ ឯកឧត្តម សុខ ប៊ុនថា រដ្ឋលេខា ធិកាក្រសួងសង្គមកិច្ច អតីតយុទ្ធជន និងយុវនីតិសម្បទា ក៍បានមានប្រសាសន៍ពាំនាំការសួរសុខទុក្ខពីសំណាក់ប្រមុខរាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ឋបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចទាំងពីរតែងតែ យកចិត្តទុកដាក់ គិតគូរនិងប្រឹងប្រែងដោះស្រាយការលំបាករបស់បងប្អូនប្រជាពលរដ្ឋគ្រប់ទីកន្លែង គ្រប់ពេលវេលា ព្រមទាំងបានសម្តែងការសោកស្តាយចំពោះផលប៉ពាល់ដោយសារជំនន់ទឹកភ្លៀងកន្លងមកថ្មីៗនេះផងដែរ។ឯកឧត្តមមានប្រសាសន៍បន្តថា៖ការជន់លិចដោយសារជំនន់ទឹកភ្លៀងឆ្នាំនេះ គឺជួបប្រទះស្ទើរតែទូទាំងប្រទេស ជាមួយគ្នានេះរាជរដ្ឋា ភិបាលបានដោះស្រាយនិងឆ្លើយតបក្នុងភាពបន្ទាន់ទៅតាមដំណាក់ៗនិងជាជំហានៗជូនគ្រួសាររងគ្រោះនិងងាយរងគ្រោះ។
ឯកឧត្តម បានផ្តាំផ្ញើដល់មេភូមិរដ្ឋបាលឃុំស្រុកសហការគ្នាស្រង់និងកំណត់មុខសញ្ញា ចំពោះគ្រួសារក្រីក្រនិងងាយរងហានិភ័យ ដើម្បីផ្តល់ប្រាក់ឧបត្ថម្ភពីរាជរដ្ឋាភិបាលដែលជាកម្មវិធីថ្មីសម្រាប់ឧបត្ថម្ភសាច់ប្រាក់ជូនគ្រួសារក្រីក្រនិងងាយរងហានិភ័យ នេះបង្ហាញពីការយកចិត្តទុកដាក់របស់រាជរដ្ឋាភិបាលចំពោះបងប្អូនប្រជាពលរដ្ឋដែលមានជីវភាពខ្វះខាតនិងជួបការលំបាកក្នុងជីវភាព។
ឯកឧត្តមក៏បានផ្តាំផ្ញើឱ្យបងប្អូនប្រជាពលរដ្ឋយកចិត្តទុកដាក់ចំពោះសុខភាពបរិភោគត្រូវឱ្យមានអនាម័យដើម្បីបង្ការពីជំងឺឆ្លងនានា និងជាពិសេសកន្លែងណាទឹកមិនទាន់ស្រកទឹកអស់ ឬរស់នៅជិតស្ទឹងបឹងបួរក៍សូមប្រយ័ត្នចំពោះកុមារតូចៗ ចៀសវាងការលង់ជាយថាហេតុ ហើយអ្វីដែលមិនត្រូវភ្លេចនោះគឺបន្តការបង្ការទប់ស្កាត់ជាមួយជំងឺកូវីដ-១៩ ថ្វីបើការឆ្លងមានការថមថយតែយើងមិនត្រូវមើលរំលោងនោះទេ ហេតុនេះបងប្អូនត្រូវបន្តការចាក់វ៉ាក់សាំងតាមការកំណត់ឱ្យបានគ្រប់ៗគ្នា៕
ដោយ ÷ ពន្លឺ
