ខេត្តសៀមរាប ÷ ប្រជាពលរដ្ឋដែលរងគ្រោះមហន្ដរាយដោយទឹកជំនន់ចំនួន ១០០ គ្រួសារ នៅក្នុងស្រុកប្រាសាទបាគង ខេត្ដសៀមរាប បានទទួលស្បៀងបម្រុងទុកមានគ្រឿងឧបភោគបរិភោគ និងគ្រាប់ពូជស្រូវ ពីគណៈកម្មាធិការគ្រប់គ្រងប្រព័ន្ធស្បៀងកម្ពុជា។
ការផ្ដល់ជូនស្បៀងនេះ ធ្វើឡើងនៅក្នុងសាលាស្រុកប្រាសាទបាគង ខេត្ដសៀមរាប កាលពីរសៀលថ្ងៃទី២០ ខែតុលា ឆ្នាំ២០២២នេះ ក្រោមអធិបតីភាពលោក ពិន ប្រាកដ អភិបាលរងខេត្ដសៀមរាប និងអស់ លោក លោកស្រី ប្រធាន អនុប្រធាន មន្ទីរ អង្គភាពពាក់ព័ន្ធ ជុំវិញខេត្តនិង អាជ្ញាធរស្រុក អញ្ជើញចូលរួមផងដែរ។
តាមរបាយការណ៍របស់លោក សូរ ប្លាតុង អភិបាលស្រុកប្រាសាទបាគង បានបង្ហាញថា៖ជំនន់ទឹកភ្លៀងនៅក្នុងភូមិសាស្រ្ដស្រុកប្រាសាទបាគងកន្លងមក ដែលធ្វើឲ្យប្រជាពលរដ្ឋរងផលប៉ះពាល់ដោយសារទឹកជំនន់ជន់លិចនោះមានចំនួនជាង ៣០០គ្រួសារ ដោយក្នុងនោះ ប្រជាពលរដ្ឋដែលបានមកទទួលអំណោយនាពេលនេះមានចំនួន ១០០គ្រួសារ ដែល រងផលប៉ះពាល់ផងដែរ សម្រាប់ពួកគាត់យកទៅប្រើប្រាស់ប្រចាំថ្ងៃ។
ក្នុងឱកាសនោះដែរលោកសូរប្លាតុង ក៍បានមានប្រសាសន៍អំពាវនាវ និងសូមឲ្យបងប្អូនប្រជាពលរដ្ឋទាំងអស់អញ្ជើញទៅពិនិត្យមើលបញ្ជីឈ្មោះនិងចុះឈ្មោះបោះឆ្នោតនៅតាមសាលាឃុំឲ្យបានគ្រប់ៗគ្នា ចំពោះការចុះឈ្មោះបោះឆ្នោតនេះ គឺចាប់ពីថ្ងៃទី២០ ខែតុលា រហូតដល់ថ្ងៃទី០៨ខែធ្នូ ឆ្នាំ២០២២ ដូច្នេះ សូមពុកម៉ែបងប្អូនអញ្ជើញទៅចុះឈ្មោះឲ្យទាន់ពេលវេលា។
លោក ពិន ប្រាកដ អភិបាលរងខេត្តសៀមរាប បានមានប្រសាសន៍ថា ផ្ដល់ស្បៀងនេះគឺជាកាតព្វកិច្ច និងការឈឺឆ្អាលរបស់ប្រមុខរាជរដ្ឋាភិបាលកម្ពុជា ក្នុងការយកចិត្តទុកដាក់អំពីសុខទុក្ខរបស់បងប្អូនប្រជាពលរដ្ឋដែលកំពុងរងគ្រោះ និងជួបការលំបាកនោះ ដែលតែងតែប្រតិបត្តិជាប់ជាប្រចាំគ្រប់កាលៈទេសៈមិនប្រកាន់ពណ៌សម្បុរជាតិសាសន៍ឬគណបក្សនយោ បាយណាមួយឡើយ។ លោកអភិបាលរងខេត្តក៍បានបន្តថា បើទោះបីស្បៀងទាំងនេះ មិនច្រើនក៍ពិតមែន ប៉ុន្ដែអាចជួយសម្រួលដល់ជីវភាពប្រជជាពលរដ្ឋបានមួយគ្រាៗដែរ ដែលនេះ ជាការបង្ហាញពីការយកចិត្ដទុកដាក់ពីរាជរដ្ឋាភិបាល គឺគ្មានគបក្សណាមួយក្រៅពីគណបក្សប្រជាជនកម្ពុជាទេ ដែលបានជួយប្រជាពលរដ្ឋជួបការលំបាក់។ ជាមួយគ្នានោះកាកកបាទក្រហមកម្ពុជា ក៍តែងតែជួយដល់ប្រជាពលរដ្ឋក្រីក្រផងដែរ ៕
ដោយ ÷ ពន្លឺ
