អគារសិក្សា១ខ្នង ដែលជាជំនួយឥតសំណងរបស់អង្គការសម្រេចសុបិនកុមារកម្ពុជា ត្រូវបានដាក់ សម្ពោធអោយប្រើប្រាស់

ខេត្តសៀមរាប ÷ អគារសិក្សាថ្មី១ខ្នងមាន៤បន្ទប់ នៅក្នុងអនុវិទ្យាល័យធ្លក ស្ថិតនៅ ភូមិស្មាច់ ឃុំត្រាំសសរ ស្រុកស្រីស្នំ ខេត្តសៀមរាប ដែលជាជំនួយរបស់អង្គការសម្រេចសុបិនកុមារកម្ពុជា ត្រូវបានដាក់សម្ភោធអោយប្រើប្រាស់ នៅរសៀលថ្ងៃទី១៩ខែតុលា ឆ្នាំ២០២២ក្រោមអធិបតីភាព លោកស្រី យូ សុភា អភិបាលរងខេត្តសៀមរាប។

លោក ម៉ាក ថូម៉ាស់ ជេននី សហស្ថាបនិរបស់សមាគមសម្រេចសុបិនកម្ពុជា បានមានប្រសាសន៍ថា ៖ អគារសិក្សាថ្មី១ខ្នង៤បន្ទប ដែលបានដាក់អោយប្រើប្រាស់នាពេលនេះគឺមានទំហំ បណ្ដោយប្រវែងចំនួន ៣៦ម៉ែត្រ និង ទទឹងប្រវែង៩ម៉ែត្រ ស្មើនឹង ៣២៤ម៉ែត្រការ៉េ ចែកចេញជា០៤បន្ទប់ មានបង្គន់អនាម័យ០១ខ្នងស្មើនឹង២បន្ទប់ ព្រមទាំងមានបំ ពាក់គ្រឿងសង្ហារឹម ដែលចំណាយថវិកាសរុប ៤៩.០០០ ដុល្លារ ព្រមទាំងមានថវិកាចូលរួមពីសហគមន៍ចំនួន ៨.៩០០.០០០រៀលផងដែរ។ លោក ម៉ាក ថូម៉ាស់ ជេននី បានមានប្រសាសន៍បន្តថារូបលោកតែងតែមានក្ដីស្រម៉ៃ និងចង់ឃើញកុមារកម្ពុជាបានចូលរៀនទាំងអស់គ្នាដូចនៅប្រទេសរបស់លោកដែរហើយការអបរំពិតជាមានសារៈសំខាន់ ខ្លាំងណាស់ ។ លោកបន្តដែរមកទល់ពេលនេះ តាមរយៈអង្គការសម្រេចសុបិនកម្ពុជា បានសាងសង់អគារសិក្សាចំនួនជិត២០០អគារ ហើយអង្គការសម្រេចសុបិនកម្ពុជា បានធ្វើសកម្មភាពទៅលើ ប្រទេសចំនួន៤ ក្នុងតំបន់អាស៊ី ដែលមានប្រទេសកម្ពុជា ថៃ ភូមា និងប្រទេសឡាវ ដោយមើលឃើញពីការលំបាក នឹងការខ្វះខាត សាលារៀន របស់ប្រទេសទាំងបួននេះផងដែរ។

លោកស្រី យូ សុភា អភិបាលរងខេត្តសៀមរាបក៏បានមានប្រសាសន៍ថាអគារសិក្សាថ្មីនេះជាសមិទ្ធផលថ្មីមួយបន្ថែមទៀតជូនដល់ក្មួយៗសិស្សានុសិស្ស ក៏ដូចជាលោកគ្រូ អ្នកគ្រូផងដែរ ។ លោកស្រី យូសុភា បានបន្តថាសកម្មភាពរបស់ អង្គការសម្រេចសុបិនកុមារកម្ពុជា គឺស្របទៅនឹងគោលនយោបាយ របស់រាជរដ្ឋាភិបាលកម្ពុជា ក្នុងការបណ្ដុះបណ្ដាល និងអភិវឌ្ឍធនធានមនុស្សនៅកម្ពុជា។ លោកស្រីក៏បានថ្លែងអំណរអរគុណ និងកោត សរសើរ ចំពោះ អង្គការសម្រេចសុបិនកុមារកម្ពុជា ដែលបានផ្តល់នូវ សមិទ្ធ ផលដ៏សំខាន់ និងមានតំលៃដ៏វិសេសវិសាល ក្នុងការរួមចំណែកយ៉ាងថ្លៃថ្លាដល់ការស្តារ និងអភិវឌ្ឍន៍វិស័យអបរំ ហើយក៏សូមអោយអង្គការសម្រេចសុបិនកម្ពុជា នៅតែបន្តជួយអភិវឌ្ឍន៍វិស័យអប់រំនៅកម្ពុជាជាពិសេសបន្តទៀត។ ក្នុងនោះផងដែរលោកស្រីអភិបាលរងខេត្តក៏បានមានប្រសាសន៍ផ្តាំផ្ញើរដល់ប្អូនៗសិស្សានុសិស្សទាំងអស់ សូមយកចិត្តទុកដាក់ត្រូវថែរក្សា អាគារសិក្សាថ្មីទាំងនេះ ដោយរៀបចំរក្សាការពារអនាម័យ ជាងនេះទៀត សូមឲ្យក្មួយៗ ជាសិស្សានុសិស្ស ខិតខំប្រឹងប្រែងរៀនសូត្រ ឲ្យបានចប់ចុងចប់ដើម ព្រោះក្មួយៗទាំងអស់នេះហើយ គឺជាទំពាំងស្នងឬស្សី ហើយក្មួយៗត្រូវយល់ថា ចំណេះវិជ្ជា គឺជាស្ពាន អាចចម្លងមនុស្ស ឲ្យឆ្លងផុត ពីឋានៈមួយទៅឋានៈមួយបានដោយងាយ ជាងនេះទៀត សូមឱ្យក្មួយៗ ជៀសឲ្យផុតពីគ្រឿងញៀន ដើម្បីក្លាយខ្លួន ទៅជាមនុស្សមានប្រយោជន៍ សម្រាប់ប្រទេសជាតិ នាពេលអនាគត៕

ដោយ ÷ ពន្លឺ