ខេត្តសៀមរាប ÷ នាព្រឹកថ្ងៃទី១៩ខែតុលាឆ្នាំ២០២២ នេះប្រជាពលរដ្ឋដែលរងគ្រោះមហន្ដរាយដោយទឹកជំនន់ចំនួន២.៨៧៤គ្រួសារ នៅក្នុងស្រុកជីក្រែង ខេត្ដសៀមរាប បានទទួលស្បៀងអាហារបម្រុងទុកជាគ្រឿងឧបភោគបរិភោគ និងគ្រាប់ពូជស្រូវពីគណៈកម្មា ធិការគ្រប់គ្រងប្រព័ន្ធស្បៀងកម្ពុជា ដើម្បីជួយសម្រាលទុក្ខលំបាកក្នុងគ្រាមានអាសន្ន ។
ការផ្ដល់ស្បៀងនេះ ធ្វើឡើងនៅក្នុងវត្ដឥន្ទ្រឧស្សាហ៍ ហៅវត្ដជីក្រែង ស្ថិតនៅឃុំជីក្រែង ស្រុកជីក្រែង ខេត្ដសៀមរាបក្រោមអធិបតីភាពឯកឧត្ដម ទៀ សីហា អភិបាលនៃគណៈអភិបាលខេត្តសៀមរាប ។ តាមរបាយការណ៍របស់លោក ពៅ ប៊ុនធឿន អភិបាលស្រុកជីក្រែង បង្ហាញថា៖ ជំនន់ទឹកភ្លៀងនៅក្នុងភូមិសាស្រ្ដស្រុកជីក្រែង ចាប់ពីថ្ងៃទី ២៣ ខែកញ្ញា ឆ្នំា២០២២ រហូតដល់ថ្ងៃទី១៧ ខែតុលា ឆ្នាំ២០២២ បានរងផលប៉ះពាល់ដោយសារទឹកជំនន់ជន់លិចមានចំនួន១២ឃុំ ដោយក្នុងនោះ ប្រជាពលរដ្ឋដែលរង ផលប៉ះពាល់ចំនួន ២.៧២០គ្រួសារ កុមារលង់ទឹកស្លាប់ចំនួន ០២នាក់ លិចលំនៅដ្ឋានកម្រិតស្រាលចំនួន១៧២គ្រួសារ លិចទីធ្លាសាលារៀនចំនួនលិចបរិវេណមណ្ឌលសុខភាព លិចអគាររដ្ឋបាលឃុំ លិចវត្តអារាម ព្រមទាំងលិចហេដ្ឋារចនាសម្ព័ន្ធផ្លូវថ្នល់មួយចំនួនបណ្ដាលឱ្យខូចខាតប្រវែង ២.៣១៦ម៉ែត្រ ដំណាំស្រូវរងផលប៉ះពាល់ចំនួន ២.៧៧៩ហិកតា និងខូចខាតចំនួន ១៣៥ហិកតា ក្នុងនោះតម្រូវការស្ដាដាំដុះឡើងវិញចំនួន ៥២ហិកតាស្មើនឹង ១២១ គ្រួសារ។
លោកអភិបាលស្រុកក៏បានមានប្រសាសន៍ បន្ថែមទៀតថា ប្រជាពលរដ្ឋក្រីក្រដែលរងគ្រោះដោយសារទឹកជំនន់សរុបចំនួន ២.៨៧៤ គ្រួសារ ដែលត្រូវទទួលស្បៀងសង្គ្រោះបន្ទាន់របស់រាជរដ្ឋាភិបាលកម្ពុជា និងទទួលបានគ្រាប់ពូជស្រូវមានចំនួន១២១គ្រួសារ សម្រាប់ ពួក គាត់យកទៅដំាស្រូវស្តារឡើងវិញក្នុងអំឡុងពេលទឹកកំពុង ស្រកជាបណ្តើរៗនេះ។
ក្នុងឱកាសនោះដែរ ឯកឧត្ដម ទៀ សីហា អភិបាលខេត្ដសៀមរាប បានមានប្រសាសន៍ថា ការផ្ដល់ស្បៀងនេះគឺជាកាតព្វកិច្ច និងការឈឺឆ្អាលរបស់ប្រមុខរាជរដ្ឋាភិបាលកម្ពុជា ក្នុងការយកចិត្តទុកដាក់អំពីសុខទុក្ខរបស់បងប្អូនប្រជាពលរដ្ឋដែលកំពុងរងគ្រោះ និងជួបការលំបាកនោះ ដែលតែងតែប្រតិបត្តិជាប់ជាប្រចាំគ្រប់កាលៈទេសៈមិនប្រកាន់ពណ៌សម្បុរជាតិសាសន៍ឬគណបក្សនយោបាយណាមួយឡើយ ។ ឯកឧត្ដម បានបន្តថា រាជរដ្ឋាភិបាលកម្ពុជា នីតិកាលទី៦ នៃរដ្ឋសភា ដែលមានសម្តេចតេជោ ហ៊ុន សែន ជាប្រមុខដឹកនាំដ៏ឆ្នើម បាននឹងកំពុងបន្តពុះពារជំនះរាល់ការលំបាក និងឧបសគ្គនានា ដឹកនាំជោគ វាសនាកម្ពុជា ដើម្បីឈានទៅសម្រេចបាននូវសមិទ្ធ ផលបន្ថែមទៀត ក្នុងកិច្ចអភិវឌ្ឍសេដ្ឋកិច្ចសង្គមសំដៅកាត់បន្ថយភាពក្រីក្ររបស់ប្រជាពលរដ្ឋ តាមរយៈការជំរុញឱ្យមានស្ថិរភាព កំណើនសេដ្ឋកិច្ចជាតិ ការពង្រឹងសន្តិភាព ស្ថិរភាពនយោបាយ និងបង្កើតកិច្ចសហប្រតិបត្តិការអន្តរជាតិ ជាមួយបណ្តាប្រទេសនានា នៅក្នុងសកលលោកផងដែរ ។
ឯកឧត្តម អភិបាលខេត្តក៏បានមានប្រសាសន៍បញ្ជាក់បន្ថែមទៀថាបើទោះបីស្បៀងអាហារទាំងនេះ មិនច្រើនក៏ពិតមែន ប៉ុន្ដែអាចជួយសម្រួលដល់ជីវភាពរបស់បងប្អូនប្រជាពលរដ្ឋបានមួយគ្រាៗដែរ ដែលនេះបង្ហាញពីការយកចិត្ដទុកនិង កិច្ចការងារចាំបាច់បំផុតដែលប្រមុខរាជរដ្ឋាភិបាលសម្តេចតេជោ ហ៊ុន សែន តែងតែណែនាំឲ្យអាជ្ញាធរគ្រប់លំដាប់ថ្នាក់ ត្រូវយកចិត្តទុកដាក់ដោយមិនទុកឲ្យប្រជាពលរដ្ឋណាម្នាក់ អត់ស្បៀងអាហារ ឬមិនមានការជួយជ្រោម ជ្រែងពីអាជ្ញាធរនោះឡើយ៕
