ភ្នំពេញ៖ ក្រសួងបរិស្ថាន ដោយសហការជាមួយក្រសួង ស្ថាប័នមានសមត្ថកិច្ច និងរដ្ឋបាលថ្នាក់ក្រោមជាតិពាក់ព័ន្ធ នឹងចាត់វិធានការដើម្បីទប់ស្កាត់ និងបង្ក្រាបរាល់សកម្មភាពឈូសឆាយ កាប់ឆ្ការ ដុត រុករាន ទន្ទ្រាន កាន់កាប់ដីព្រៃធ្វើជាកម្មសិទ្ធិ ការទិញ-លក់ដីរដ្ឋដោយខុសច្បាប់ នៅតំបន់ការពារធម្មជាតិ ដោយផ្អែកលើនីតិវិធីច្បាប់ជាធរមាន។
ការព្រមាននេះ ត្រូវបានធ្វើឡើងក្នុងសេចក្ដីជូនដំណឹង ស្តីពីការហាមឃាត់ការឈូសឆាយ កាប់ឆ្ការ ដុត រុករាន ទន្ទ្រាន កាន់កាប់ដីព្រៃធ្វើជាកម្មសិទ្ធិ ការទិញ-លក់ដីរដ្ឋ និងការបញ្ជាក់ការទិញ-លក់ដីរដ្ឋខុសច្បាប់ នៅតំបន់ការពារធម្មជាតិ ដែលចុះកាលពីថ្ងៃទី១២ ខែកញ្ញា ឆ្នាំ២០១៨។
ក្រសួងបរិស្ថាន បានណែនាំឲ្យបញ្ឈប់ជាបន្ទាន់នូវរាល់សកម្មភាពខុសច្បាប់ ជាអាទិ៍ ការឈូសឆាយ កាប់ឆ្ការ ដុត រុករាន ទន្ទ្រានដីព្រៃ ការសាងសង់ខ្ទម-រោង ការដាំដុះដំណាំ និងការអាស្រ័យផលលើដីរដ្ឋ។ ជាងនេះទៅទៀត ត្រូវបញ្ឈប់នូវរាល់ការទិញ-លក់ដីរដ្ឋ និងការបញ្ជាក់ការទិញ-លក់ដីរដ្ឋដោយខុសច្បាប់ នៅតំបន់ការពារធម្មជាតិ។
សេចក្ដីជូនដំណឹងនេះ ត្រូវបានធ្វើឡើងបន្ទាប់ពីក្រសួងបរិស្ថានសង្កេតឃើញថា បទល្មើសខាងលើ បានបន្តកើតមាននៅតំបន់ការពារធម្មជាតិ ជាពិសេសនៅក្នុងតំបន់ឧទ្យានជាតិព្រះសីហនុ “រាម” ឧទ្យានជាតិព្រះមុនីវង្ស “បូកគោ” ឧទ្យានជាតិព្រះសុរាម្រិត-កុសមៈ “គិរីរម្យ” តំបន់ប្រើប្រាស់ច្រើនយ៉ាងព្រែកទឹកសាបក្បាលឆាយ ដែនជម្រកសត្វព្រៃលំផាត់ និងដែនជម្រកសត្វព្រៃស្រែពក។
ក្រសួងរកឃើញទៀតថា បុគ្គលមួយចំនួនបានយកឯកសារពាក្យស្នើសុំកាន់កាប់ប្រើប្រាស់ដីធ្លី ដែលរាជរដ្ឋាភិបាលបានប្រកាសជាមោឃៈរួចហើយ មកធ្វើជាលេស ដើម្បីធ្វើសកម្មភាពខុសច្បាប់ខាងលើ នៅតំបន់ការពារធម្មជាតិ និងនៅទីតាំងដីស្របច្បាប់របស់ក្រុមហ៊ុនវិនិយោគអភិវឌ្ឍន៍ ដែលរាជរដ្ឋាភិបាលបានផ្ដល់ការអនុញ្ញាតជាគោលការណ៍៕
ដោយ ៖ កុសល់
