ព្រះសង្ឃនិងអាជ្ញាធរសង្កាត់ចំនួន៣នៃក្រុងសៀមរាប រៀបចំប្រណាំងទូកលក្ខណៈប្រពៃណី 

ខេត្តសៀមរាប ÷ ព្រះចៅអធិការវត្តអារញ្ញសាគរ បានសហការជាមួយអាជ្ញាធរសង្កាត់សៀមរាប សង្កាត់សាលាកំរើក និងសង្កាត់ជ្រាវ នៃក្រុងសៀមរាប រួមជាមួយនិងសហភាពសហព័ន្ឋយុវជនកម្ពុជាក្រុងសៀមរាប ខេត្តសៀមរាប មូលមតិគ្នាជាឯកច្ឆ័ន្ទបានផ្តួចផ្តើមរៀបចំពិធីប្រណាំងទូក និងបណ្តែតប្រទីបដើម្បីអបអរសាទរថ្ងៃចេញព្រះវស្សានិងដើម្បីរក្សាប្រពៃណីទំនៀមទម្លាប់របស់អ្នកស្រុកភូមិដែលមានតាំងពីយូរលង់ណាស់មកហើយ ក្រោមការចូលរួមឧបត្ថម្ភគាំទ្រពីព្រះសង្ឃ ថ្នាក់ដឹកនាំអាជ្ញាធរមូលដ្ឋាន ក្រុមការងារយុវជន ស.ស.យ.កខេត្តក្រុង  អាជីវករនិងសប្បុរសជននានា បានបរិច្ចាគធនធានផ្ទាល់ខ្លួនទៅតាមសទ្ឋាជ្រះថ្លានូវថវិកានិងភេសជ្ជៈសម្រាប់ជួយទ្រទ្រង់ឱ្យកម្មវិធីដំណើរការទៅយ៉ាងរលូន។

ពិធីប្រណាំងទូកលក្ខណៈប្រពៃណីនេះមានរយៈពេល២ថ្ងៃ គឺនៅវេលារសៀលថ្ងៃទី១១ និងរសៀលថ្ងៃទី១២ខែតុលាឆ្នាំ២០២២នេះ នៅចំណុចផ្លូវតាអាំក្នុងភូមិចុងស្រុក សង្កាត់សៀមរាប ជាភូមិសាស្ត្រជាប់បឹងទន្លេសាប ដែលកីឡាករសុទ្ឋតែជាបងប្អូនប្រជាពលរដ្ឋក្នុងមូលដ្ឋាននៃបណ្តាសង្កាត់នីមួយៗ ដោយមានទូកសរុបចំនួន៣០ទូក ក្នុងនោះទូក ង ចំណុះ២២នាក់ ចំនួន៤ទូក ជាទូកកិត្តិយស និង ទូកប្រណាំងដណ្តើមជ័យលាភី មានចំនួន២៦ទូក ដែលទូកនីមួយៗមានចំណុះ៦នាក់ ហើយចំណាត់ថ្នាក់ជ័យលាភី នឹងជ្រើសយកពីលេខ១ដល់លេខ៤ នឹងទទួលបានប្រាក់ឧបត្ថម្ភពីគណៈកម្មការរៀបចំពិធី ក្នុងពេលប្រកាសលទ្ឋផល។

មានប្រសាសន៍ក្នុងឱកាសបើកការប្រណាំងទូកនេះ លោក ម៉ៃ សាមេត ចៅសង្កាត់សៀមរាប បានបង្ហាញនូវក្តីសោមនស្សដែលបានសហការរៀបចំកម្មវិធីនេះឡើង ព្រោះអស់រយៈពេលជាង២ឆ្នាំមកហើយ ដែលបងប្អូនប្រជាពលរដ្ឋមិនបានជួបជុំប្រារព្ឋពិធីជួបជុំឬពិធីបុណ្យនានានោះទេ ព្រោះដោយសារការឆ្លងរាលដាលជាសកលនៃជំងឺកូវីដ-១៩ និងការអនុវត្តតាមការណែនាំនិងវិធានការនានាទប់ស្កាត់នៃការឆ្លងជំងឺកូវីដ-១៩ ។ លោក ក៍បានបន្តទៀតថា ព្រះរាជពិធីអុំទូកនេះធ្វើឡើង គឺដើម្បីដាស់តឿនឲ្យយើងទាំងអស់គ្នាដឹងគុណដល់ព្រះគង្គានិងព្រះធរណី និងរំលឹកមនុស្សឱ្យចេះថែរក្សាការពារទឹកដីឱ្យបានគង់វង្ស និងចេះស្រឡាញ់គោរពព្រះធរណី គង្គា ដោយចូលរួមសម្អាតបរិស្ថានឱ្យបានស្អាត។

លោក ម៉ៃ សាមេត ក៍បានមានប្រសាសន៍បញ្ជាក់បន្ថែមទៀតថា ដោយសារការយកចិត្តទុកដាក់និងការលះបង់ខ្ពស់របស់ប្រមុខថ្នាក់ដឹកនាំរាជរដ្ឋាភិបាល ក្រោមការដឹកនាំប្រកបដោយភាពឈ្លាសវៃនិងគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានស្វះស្វែងរកវ៉ាក់សាំងចាក់ជូនបងប្អូនគ្រប់ទីកន្លែងដោយឥតគិតថ្លៃ តាំងពីដូសជំរុញរហូតដូសមូលដ្ឋាន ទើបការឆ្លងនៃជំងឺដ៍កាចសាហាវនេះបានថយចុះជាបន្តបន្ទាប់និងសម្រេចបើកប្រទេសពេញលេញឡើងវិញ តាមរយៈការរៀនរស់តាមបែបគន្លងថ្មីជាមួយនឹងកូវីដ-១៩ ដូចនេះ ទើបយើងទាំងអស់គ្នាមានឱកាសជួបជុំនិងប្រាព្ឋពិធីផ្សេងៗ ឡើងវិញក្រោមម្លប់សុខសន្តិភាពតែមួយ៕

ដោយ ÷ ពន្លឺ