អគ្គិភ័យឆាបឆេះផ្ទះលក់អីវ៉ាន់១ខ្នង នៅក្នុងស្រុកស្រីស្នំ ខេត្តសៀមរាប បណ្ដាលឲ្យខូចខាតទ្រព្យសម្បត្តិប្រមាណ ៦ម៉ឺនដុល្លារ

ខេត្តសៀមរាប ÷ ផ្ទះប្រជាពលរដ្ឋលក់អីវ៉ាន់មួយខ្នង ស្ថិតនៅឃុំស្លែងស្ពាន ស្រុកស្រីស្នំ ខេត្តសៀមរាប ត្រូវបានអគ្គីភ័យឆាបឆេះ កាលពីនៅវេលាម៉ោង៩ នឹង ៤០នាទី ថ្ងៃទី៨ ខែតុលា ឆ្នាំ២០២២នេះ ដែលក្នុងនោះទំហំនៃការខូចខាតទ្រព្យសម្បត្តិសរុបជាទឹកប្រាក់ប្រមាណ ៦០០០០ដុល្លារ។

លោកវរសេនីយ៍ឯក អ៊ុន ស្រស់ អធិការនគរបាលស្រុកស្រីស្នំ បានឱ្យដឹងថា ផ្ទះដែលបានឆេះខាងលើមានម្ចាស់ឈ្មោះ ជិម ជឿក ភេទប្រុស អាយុ ៤៩ឆ្នាំ។ ចំពោះមូលហេតុដែលបណ្ដាលឲ្យមានករណីនេះ គឺមកពីឆ្លងចរន្តអគ្គិសនី ស្របពេលដែលម្ចាស់ផ្ទះកំពុងបូមសាំង ហើយធ្វើឱ្យសាំងកំពប់ស្រោច ទៅលើចរន្តអគ្គិសនីកំពុងឆ្លងបណ្ដាលឲ្យឆាប់ឆេះតែម្ដង។ ប្រតិបត្តិការណ៍នេះដែរ សមត្ថកិច្ចបានប្រើប្រាស់នូវរថយន្តពន្លត់អគ្គីភ័យ ១គ្រឿង ដោយបានបាញ់ពន្លត់បានទាំងស្រុងនៅវេលាម៉ោង ១១ និង០៧នាទី។

លោកវរសេនីយ៍ឯក បញ្ជាក់ថា តាមការឲ្យដឹងពីម្ចាស់ផ្ទះ អគ្គីភ័យនេះបានបណ្ដាលឲ្យខូចខាត់ទ្រព្យសម្បត្តិរួមមាន៖ ផ្ទះ ១ខ្នង ថ្មក្រោម ឈើលើ ប្រក់ស័ង្កសីចំនួន ៣ល្វែង មានទំហំ ១១x១១ម៉ែត្រឆេះទាំងស្រុង ឆេះប្រាក់ចំនួន ៧លានរៀល មាស៦ជី ភេសជ្ជៈ ១.១០០កេស ប្រេងសាំងម៉ាស៊ូត ២៥៤លីត រួមនឹងសម្ភារៈក្នុងផ្ទះមួយចំនួទៀត ដែលខូចខាតទ្រព្យសម្បត្តិសរុបជាទឹកប្រាក់ប្រមាណ ៦០.០០០ដុល្លារ។ករណីនេះក៏បណ្ដាលឲ្យមនុស្សម្នាក់ បានរងរបួសស្រាលផងដែរ៕

ដោយ ÷ ពន្លឺ