អ្នកតំណាងរាស្ត្រមណ្ឌលសៀមរាបនាំយកអំណោយរបស់សម្ដេចពិជ័យសេនាទៀ បាញ់ ជូនប្រជាពលរដ្ឋ រងគ្រោះដោយទឹកជំនន់ចំនួន៤៥០គ្រួសារ ក្នុងឃុំតាអាន ស្រុកក្រឡាញ់ 

ខេត្តសៀមរាប ÷ នៅព្រឹកថ្ងៃទី០៧ ខែតុលា ឆ្នាំ ២០២២ នេះ ឯកឧត្តម អ្នកឧកញ៉ា សៀង ណាំ អ្នកតំណាងរាស្រ្តមណ្ឌលសៀមរាប និង លោកជំទាវ អ៊ុន វុនលី សៀង ណាំ អមដំណើរដោយ អស់លោក លោកស្រី ក្រុមការងារខេត្ត និងអាជ្ញាធរស្រុកបានចុះសួរសុខទុក្ខ និងនាំយកអំណោយរបស់សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារចុះមូលដ្ឋានខេត្តសៀមរាប ជូនដល់គ្រួសារដែលរងគ្រោះដោយសារទឹកជំនន់ ដែលប្រឈមនឹងការខ្វះខាតស្បៀងអាហារចំនួន៤៥០គ្រួសារក្នុងឃុំតាអានស្រុកក្រឡាញ់។

តាមរបាយការណ៍របស់ លោក សុខ ណារ៉េត អភិបាលស្រុកក្រឡាញ់ស្តីទី ឱ្យដឹងថា៖ឆ្នាំនេះស្រុកក្រឡាញ់ មានទឹក ជំនន់ ២ដំណាក់កាលហើយ គិតមកទល់ថ្ងៃនេះ។ ដំណាក់កាលទី១ ពីថ្ងៃទី ១៧ ដល់ថ្ងៃទី ៣០ ខែកញ្ញា ទឹកបានជន់លិចក្នុងភូមិសាស្រ្តឃុំ ចំនួន០៨ នៃឃុំទំាង១០ ស្មើ និង៥៨ភូមិ នៃភូមិទាំង៩៨ លិចផ្ទះកម្រិតស្រាលចំនួន ១,៨០៧ ខ្នងផ្ទះ សរុប ចំនួន១,៩៥១គ្រួសារ (ក្នុងនោះប៉ះពាល់ ដល់គ្រួសារក្រីក្ររងគ្រោះខ្លំាង ចំនួន៧៦១ គ្រួសារ) និងលិចប៉ះពាល់ដល់ហេដ្ឋារចនាសម្ព័ន្ឋមួយចំនួនក្នុងស្រុកទៀតដូចជា លិចទីធ្លា សាលារៀន លិចបរិវេណវត្ត លិចអាគាររដ្ឋបាល(ស្រុក-ឃុំ) លិចមន្ទីរពេទ្យបង្អែកស្រុក ខូចខាតស្រូវសន្ទូង និងដំណាំរួមផ្សំ ទឹកហូរច្រោះផ្លូវលំតូចធំ។ល។ ដំណាក់កាលទី២ គឺពីថ្ងៃទី ០២ ខែតុលា ឆ្នំា២០២២ មកដល់ពេលនេះ ទឹកជំនន់ធ្វើឲ្យជន់លិច ០៤ឃុំ គឺ ឃុំតាអាន ឃុំកំពង់ថ្កូវ ឃុំស្នួល និងឃុំក្រឡាញ់ មកទល់ពេលនេះស្ថានភាពទឹកនៅនឹង និងបានស្រកចុះក្នុងឃុំ មួយចំនួនជាបណ្តើរៗ ហើយ។

ជាមួយនឹងផលប៉ះពាល់នេះដែរ ឯកឧត្តម អ្នកឧកញ៉ា សៀង ណាំ ក៍បានសម្តែងការសោកស្តាយនិងចាត់ទុកថានេះជាគ្រោះមហន្តរាយដោយធម្មជាតិ ដែលធ្វើអោយមានការខាតបង់ទ្រព្យសម្បត្តិចខាតនូវផលដំណាំ ផ្ទះសម្បែង ព្រមទាំង ប៉ះពាល់ដល់សុខភាព អនាម័យបរិស្ថាននៅក្នុងសហគមន៍ ។ ឯកឧត្តម អ្នកឧកញ៉ា សៀង ណាំ បានមានប្រសាសន៍បន្ថែមទៀតថាចំពោះគ្រោះមហន្តរាយដោយធម្មជាតិគឺ យើងមិនបានដឹងមុននោះឡើយដូច្នេះហើយសូមបងប្អូនប្រជាពលរដ្ឋត្រូវមានការប្រុងប្រយ័ត្នខ្ពស់ ក្នុងពេលទឹកកំពុងលិច ចំពោះកូនចៅតូចៗរបស់ខ្លួន កុំឲ្យកើតមាននូវប្រការអាក្រក់នៅក្នុងក្រុមគ្រួសារ សំខាន់ចំពោះសត្វអសិរពិស អនាម័យ លើចំណីអាហារ ប្រុងប្រយ័ត្នចំពោះសត្វអសិរពិស និងកុំមានការធ្វេសប្រហែសចំពោះកូនចៅតូចៗ ព្រោះនេះជារដូវវស្សា និងជំនន់ទឹកភ្លៀង មិនទាន់ស្រកអស់នៅឡើយទេ កុំឲ្យមានហេតុការអាក្រក់ណាមួយកើតឡើង និងប្រុងប្រយ័ត្នចំពោះជំងឺឆ្លងផ្សេងៗផងដែរ ។ សូមជំរាប ជូនថា អំណោយរបស់សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារចុះមូលដ្ឋានខេត្តសៀមរាប ដែលបានប្រគល់ជូនដល់ប្រជាពលរដ្ឋ តាមរយៈឯកឧត្តម អ្នកឧកញ៉ា សៀង ណាំ តំណាងរាស្រ្តមណ្ឌលសៀមរាប នាពេលនោះដោយក្នុងមួយគ្រួសារៗទទួលបាន៖ អង្ករចំនួន២៥គ.ក្រ ត្រីខ១យួរ និងថវិកាចំនួន ៥.០០០រៀល សម្រាប់ធ្វើជាសោហ៊ុយលើមធ្យោបាយធ្វើដំណើរផងដែរ៕

ដោយ ÷ ពន្លឺ