ថ្នាក់ដឹកនាំសាសនិកឥស្លាមខេត្តសៀមរាបចុះជួបសំណេះសំណាលជាមួយក្រុមគ្រួសារខ្មែរឥស្លាម ដែលស្ម័គ្រចិត្តផ្លាស់ប្ដូរទីលំនៅចេញពីតំបន់រមណីយដ្ឋានអង្គរទៅនៅភូមិធម្មជាតិរុនតាឯក !

ខេត្តសៀមរាប ÷ នៅរសៀលថ្ងៃ ទី០៥ ខែតុលា ឆ្នាំ២០២២នេះ ឯកឧត្តម អែល សៀត សមាជិកក្រុមប្រឹក្សាខេត្ត និងជាប្រធានគណៈចលនាឥស្លាមខេត្តសៀមរាប បានដឹកនាំសមាជិកគណៈចលនាឥស្លាមខេត្តជួបសំណេះសំណាលជាបងប្អូនសាសនិកឥស្លាមចំនួន៤៨គ្រួសារដែលបានស្ម័គ្រចិត្តរុះរើផ្ទះនៅក្នុងតំបន់រមណីយដ្ឋានអង្គរ ទៅរស់នៅក្នុងភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី ខេត្តសៀមរាប។

ក្នុងនាមថ្នាក់ដឹកនាំសាសនិកឥស្លាមខេត្តសៀមរាប ឯកឧត្តម អែល សៀត ក៍បានមានប្រសាសន៍ថ្លែងអរគុណចំពោះបងប្អូនសាសនិឥស្លាមទាំង៤៨គ្រួសារដែលបានយល់ព្រមស្ម័គ្រចិត្តរុះរើសំណង់ខុសច្បាប់របស់ខ្លួន ចេញពីតំបន់រមណីយដ្ឋានអង្គរហើយ ទៅតាំងលំនៅដ្ឋានថ្មីស្ថិតនៅតំបន់ភូមិធម្មជាតិរុនតាឯក ស្រុកបន្ទាយស្រី តាមរយៈនៃចាប់ឆ្នោតទទួលយក ដីឡូតិ៍ ដែលផ្តល់ដោយរាជរដ្ឋាភិបាល។ ឯកឧត្តម បានមានប្រសាសន៍ទៀតថា នៅពេលនេះក្រុមការងារកំពុងប្រើគ្រឿងចក្រជាច្រើនគ្រឿងដើម្បី ឈូសឆាយសំអាតផ្ទៃដី ធ្វើផ្លូវយ៉ាងធំទូលាយ ខ្វាត់ខ្វែង រៀបចំប្រព័ន្ធផ្លូវទឹក ព្រមទាំងបែងចែងដីជាផ្នែកៗ ហើយដាក់លេខសំគាល់ យើងអាចជឿជាក់បានថា អនាគត រុនតាឯកនឹងក្លាយទៅជាភូមិអភិវឌ្ឍន៍និងជាទីប្រជុំ ជនថ្មីមួយដែលពុំធ្លាប់មានពីមុនមក ហើយការរៀបចំហេដ្ឋារចនាសម្ព័ន្ធនៅភូមិធម្មជាតិរុនតាឯកនោះ គឺបានគិតគូរយ៉ាងសំខាន់ទៅលើ ការកសាងសាលារៀន មណ្ឌលសុខភាព ទីវត្តអារាម ព្រមទាំងអាគារដ្ឋបាល និងវិស័យសំខាន់ៗជាច្រើនទៀត ។

នាឱកាសនោះផងដែរ លោក លាស់ នី ដែលជាតំណាងបងប្អូនសាសនិកឥស្លាមទាំង៤៨គ្រួសារក៍បានមានប្រសាសន៍លើកឡើងនិងស្នើសុំ តាមរយៈ ឯកឧត្តម អែល សៀត សមាជិកក្រុមប្រឹក្សាខេត្ត សូមជួយអន្តរាគមន៍ និង បន្តពិភាក្សាជាមួយ ឯកឧត្តម គណៈអភិបាល នៃគណៈអភិបាលខេត្តសៀមរាប ដើម្បីរកដំណោះស្រាយជូនដល់ពួកគាត់នូវបញ្ហាបន្ថែមដូចជា ៖

1.ការស្នើសុំអោយបងប្អូនសាសនិកឥស្លាមបាន        រស់នៅក្នុងដីឡូតិ៍ជាប់គ្នាហើយជាក្រុមដើម្បីងាយស្រួលក្នុងការប្រតិបត្តិវិន័យធម៌សាសនា ។             2. ស្នើសុំដីសម្រាប់សាងសង់ម៉ាស្ជិតឬព្រះវិហារ ។ 3. ស្នើសុំអោយមានសាលារៀនសាសនិឥស្លាម ។ ៤. ស្នើសុំដីសម្រាប់បញ្ចុះសព ឬ ដីកូពួរ សម្រាប់បងប្អូនឥស្លាម និងទី                                     ៥.ស្នើសុំដីសម្រាប់សាងសង់ផ្ទះគ្រូបង្រៀនរបស់សាសនិកឥស្លាមផងដែរ ៕

ដោយ ÷ ពន្លឺ