ប្រជាពលរដ្ឋរងគ្រោះដោយគ្រោះធម្មជាតិ និងចាស់ជរាក្រីក្រ ចំនួន៣៥០គ្រួសារនៅក្នុងស្រុកពួកនិងស្រុកអង្គជុំខេត្តសៀមរាបទទួលបានអំណោយរបស់រាជរដ្ឋាភិបាលកម្ពុជា

ខេត្តសៀមរាប ÷ កាលពីរសៀលថ្ងៃទី ៣០ ខែកញ្ញា ឆ្នាំ២០២២នេះ ឯកឧត្តម វង សូត្រ រដ្ឋមន្ត្រី ក្រសួងសង្គមកិច្ច អតីតយុទ្ធជន និងយុវនីតិសម្បទា អមដំណើរដោយឯកឧត្តម លោកជំទាវ ជារដ្ឋលេខាធិការ អនុរដ្ឋលេខាធិការ អាជ្ញាធរខេត្ត ស្រុក ថ្នាក់ដឹកនាំមន្ទីរ បានអញ្ជើញចុះជួបសំណេះសំណាលនិងនាំយកអំណោយរបស់រាជរដ្ឋាភិបាលកម្ពុជាប្រគល់ជូនដល់បងប្អូនប្រជាពលរដ្ឋរងគ្រោះមហន្តរាយដោយធម្មជាតិ និង ចាស់ជរាក្រីក្រ ចំនួន៣៥០គ្រួសារ នៅក្នុងស្រុកពួក មកពីឃុំសសរស្តម្ភ ,ឃុំក្តីរុន ស្មើ ១២ភូមិ មានចំនួន ២០០គ្រួសារ និង ស្រុកអង្គរជុំ មាន៣ឃុំ ស្មើ ២១ភូមិ ចំនួន ១៥០គ្រួសារ ។

មានប្រសាសន៍សំណេះសំណាលនាឱកាសនោះ ឯកឧត្តម វង សូត្រ ក៏បានលើកឡើងថា ក្រោមការយកចិត្តទុកដាក់ខ្ពស់បំផុតពីប្រមុខរាជរដ្ឋាភិបាល ក្នុងការថែទាំព្យាបាល វិធានការបង្ការទប់ស្កាត់ ព្រមទាំងយុទ្ធ នាការ ចាក់ស្រោចវ៉ាក់សាំង បង្ការទប់ស្កាត់ កូវីដ-១៩ ជូនយដល់បងប្អូនប្រជាពលរដ្ឋ ទាំងវ៉ាក់សាំងដូសមូលដ្ឋាន និងដូសជំរុញ ធ្វើឲ្យការការពារបាននូវអាយុជីវិតដល់បងប្អូននៅទូទាំងប្រទេស ដោយឥតគិតថ្លៃ ដោយមិនប្រកាន់និន្នាការនយោបាយ ពូជសាសន៍នោះឡើយ ។ ឯកឧត្តមក៏បានពាំនាំនូវការផ្តាំផ្ញើពី    សម្តេចតេជោ ហ៊ុន សែន នាយករដ្ឋមន្ត្រី ព្រមទាំងបានសម្តែង នូវការសោកស្តាយ អាណិតអាសូរ ចំពោះបងប្អូនរងគ្រោះធម្មជាតិ ដែលធ្វើឲ្យខូចខាតនូវផលដំណាំ ផ្ទះសម្បែង ព្រមទាំង ប៉ះពាល់ដល់សុខភាព អនាម័យបរិស្ថាននៅក្នុងសហគមន៍ ។

ឯកឧត្តមរដ្ឋមន្ត្រី ក៏បានលើកផងដែរ ក្នុងវិបត្តិកូវិដ១៩ និងបញ្ហាវិបត្តិសេដ្ឋកិច្ច នៅលើពិភពលោក ដែលបានធ្វើឲ្យប៉ះពាល់ ដល់ស្ថានភាពជីវភាពរស់នៅប្រចាំថ្ងៃ របស់បងប្អូនប្រជាពលរដ្ឋនៅទូទាំងប្រទេស ជាពិសេសគ្រួសារក្រីក្រ ។ ដើម្បីលើកកំពស់ជីវភាពប្រជាពលរដ្ឋរងគ្រោះ នឹងងាយរងផលប៉ះពាល់ រាជរដ្ឋាភិបាលកម្ពុជា បានបញ្ចេញថវិការាប់រយលានដុល្លារ សម្រាប់ឧបត្ថម្ភ ជូនដល់គ្រួសារក្រីក្រ និង ងាយរងគ្រោះ ក្នុងអំឡុងពេលប្រយុទ្ធនឹងជម្ងឺកូវីដ-១៩ តាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា មានតួនាទីយ៉ាងសំខាន់ ក្នុងការបើក-ផ្តល់ថវិការបបគោលនយោបាយជូនដល់ជនពិការក្រីក្រ នៅតាមសហគមន៍ ។ ក្នុងនោះដែរឯកឧត្តមក៏បានបញ្ជាក់ផងដែរ ចំពោះបងប្អូនដែលមានប័ណ្ណ(ក្រ១ ក្រ២) ប្រមុខរាជរដ្ឋាភិបាល បានយកចិត្តទុកដាក់ លើបងប្អូន តាមគោលនយោបាយឧបត្ថម្ភសាច់ប្រាក់ជូនបងប្អូនជារៀងរាល់ខែ ។

តាមការបញ្ជាក់របស់លោក គង់ សំអឿន ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប បានឲ្យដឹង ពីវិស័យសុខមាលភាពសង្គម ចំពោះស្ត្រីមានផ្ទៃពោះ ចំនួន ៨.៣៥៥នាក់ ,ស្ត្រីសម្រាលកូន ៥.៣៦៧ នាក់ និងកុមារ ចំនួន ២.៣២៤នាក់ ដែលបានទទួលបានប្រាក់ឧបត្ថម្ភ ។ ចំពោះការឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងប្រយុទ្ធនឹងជម្ងឺកូវិដ១៩ ក្នុងឆ្នាំ២០២០ តាមគោលនយោបាយឧបត្ថម្ភសាច់ប្រាក់ជូនបងប្អូន បាន ៤៩.៤៣២គ្រួសារ ក្នុងនោះគ្រួសារ(ក្រ១) ចំនួន ១៨.៥៧៥គ្រួសារ , (ក្រ២) ចំនួន៣០.៨៥៧គ្រួសារ ។ កម្ពុជាបានដាក់ចេញនូវយុទ្ធសាស្ត្រចតុកោណ ដំណាក់កាលទី៤ ដែលបានផ្ដោតជាសំខាន់ ទៅលើយុទ្ធសាស្ត្រ គាំពារសង្គម សម្រាប់ជនក្រីក្រ និងជនងាយរងគ្រោះ ជាគោលនយោបាយអាទិភាពរបស់រាជរដ្ឋាភិបាល ដែលធានាឲ្យបងប្អូនទទួលបាន នូវផលប្រយោជន៍ ពីប្រព័ន្ធជំនួយសង្គម និងរបបសន្តិសុខសង្គម បានកាន់តែល្អប្រសើរឡើង៕

ដោយ ÷ ពន្លឺ