ខេត្តសៀមរាប ÷ អនុវត្តតាមគោលនយោបាយដែលបានប្រកាសដ៏ខ្ពង់ខ្ពស់ដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នៅ ថ្ងៃទី២៩ ខែកញ្ញា ឆ្នាំ២០២២នេះ ក្រុមការងារចម្រុះបានចាប់ផ្ដើមយុទ្ធនាការកំណត់អត្តសញ្ញាណ និងផ្ដល់បណ្ណសមធម៌ (បណ្ណក្រីក្រ) ជូនក្រុមគ្រួសារដែលស្ម័គ្រចិត្តផ្លាល់ទីលំនៅពីតំបន់រមណីយដ្ឋានអង្គរ និងតាមមាត់ស្ទឹងសៀមរាប មកកាន់ភូមិធម្មជាតិរុនតាឯក ស្រុកបន្ទាយស្រី ខេត្តសៀមរាប ដោយមានការអញ្ជើញចូលរួមដោយ ឯកឧត្តមបណ្ឌិត ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុមប្រឹក្សាជាតិគាំពារសង្គម និង ឯកឧត្ដម ថេង បញ្ញាធន ប្រតិភូរាជរដ្ឋាភិបាលទទួលជាអគ្គនាយកផែនការ នៃក្រសួងផែនការ ដោយមានការចូលរួមពីសំណាក់អាជ្ញាធរមូលដ្ឋានផងដែរ។
ក្នុងឱកាសនោះដែរ ឯកឧត្តមបណ្ឌិត ចន ណារិទ្ធ និងឯកឧត្ដម ថេង បញ្ញាធន បានសាកសួរ និងផ្ដល់ព័ត៌មានលម្អិតបន្ថែមអំពីដំណើរការនៃការកំណត់អត្តសញ្ញាណ និងអត្ថប្រយោជន៍នៃបណ្ណសមធម៌ ដោយ ឯកឧត្តមបណ្ឌិត ចន ណារិទ្ធ បានសង្កត់ធ្ងន់ថា ដោយមានការចង្អុលបង្ហាញឱ្យមានការយកចិត្តទុកដាក់ខ្ពស់ លើសុខទុក្ខ និងផ្តល់ការគាំពារសេវាសង្គមរយៈពេលវែងដល់បងប្អូនប្រជាពលរដ្ឋដែលព្រមផ្លាស់ប្តូរលំនៅដ្ឋានពីតំបន់រមណីយដ្ឋានអង្គរ និងតាមមាត់ស្ទឹងសៀមរាប មកកាន់ភូមិធម្មជាតិរុនតាឯក ស្រុកបន្ទាយស្រី ខេត្តសៀមរាប, ក្រុមប្រឹក្សាជាតិគាំពារសង្គមដែលជាសេនាធិការរបស់រាជរដ្ឋាភិបាលក្នុងការសម្របសម្រួល និងតម្រង់ទិសរួមលើការងារគាំពារសង្គម បានដឹកនាំសម្រួលសម្រួលយ៉ាងសកម្មក្នុងការធ្វើយ៉ាងណាឱ្យបងប្អូនប្រជាពលរដ្ឋទាំងអស់ដែលព្រមមករស់នៅជាក់ស្តែងនៅភូមិធម្មជាតិរុនតាឯកទទួលបានការគាំពារ និងជាពិសេសអាចទទួលបានទទួលបានការឧត្តម្ភសាច់ប្រាក់ពីកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ ក៏ដូចជាប្រាក់ឧត្តម្ភពីកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំជាដើម ដែលជាការណែនាំដ៏ខ្ពង់ខ្ពស់របស់ សម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា។
យុទ្ធនាការនេះ ដឹកនាំដោយក្រសួងផែនការ និងអនុវត្តដោយក្រុមការងារចម្រុះនៃអាជ្ញាធរភូមិ-ឃុំ ដោយមានកិច្ចសហការពីរដ្ឋបាលស្រុក, ក្រុមប្រឹក្សាជាតិគាំពារសង្គម និងក្រសួងសង្គមកិច្ច អតីតយុទ្ធជន និងយុវនីតិសម្បទា។
សូមបញ្ជាក់ថា បណ្ណសមធម៌ ឬបណ្ណក្រីក្រនេះ មានអត្ថប្រយោជន៍ជាច្រើន រួមមានការទទួលបានការពិនិត្យ និងព្យាបាលជំងឺនៅពេទ្យរដ្ឋដោយមិនចាំបាច់បង់ថ្លៃក្រោមមូលនិធិសមធម៌សុខាភិបាល, កម្មវិធីឧបត្ថម្ភសាច់ប្រាក់ជូនស្រីមានផ្ទៃពោះ និងកុមារអាយុក្រោម២ឆ្នាំ និងជាពិសេសប្រាក់ឧបត្ថម្ភប្រចាំខែពីកម្មវិធីឧបត្ថម្ភសាច់បា្រក់ជូនគ្រួសារក្រីក្រ និងងាររងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ ជាដើម៕
ដោយ ÷ ពន្លឺ
