ខេត្តកំពង់ឆ្នាំង ៖ ស្ដាប់នៅថ្ងៃទី២៨ ខែកក្កដាឆ្នាំ២០២២ លោក ងិន ហ៊ុន ប្រធានមន្ទីរកសិកម្ម រុក្ខា ប្រមាញ់ និងនេសាទ ខេត្តកំពង់ឆ្នាំង បានយកត្រីមេពូជ និងកូនត្រីពូជ ៧ប្រភេទ ចំនួន៦ម៉ឺនក្បាល ទៅលែងនៅអាងទឹកឈ្វាំង ស្ថិតនៅឃុំរលាប្អៀរ ស្រុករលាប្អៀរ ខេត្តកំពង់ឆ្នាំង នៅថ្ងៃទី ២៨ ខែកក្តដា ឆ្នាំ២០២២។
លោក ងិន ហ៊ុន បានបន្តថា ដើម្បីការពារ និងអភិរក្សធនធានជលផល ខណ្ឌរដ្ឋបាលជលផលនៃមន្ទីរកសិកម្ម ររុក្ខាប្រមាញ់ និងនេសាទ បានសហការជាមួយអាជ្ញាធរ សមត្ថកិច្ច កងកម្លាំង ក្នុងការបង្រ្កាប និងទប់ស្កាត់បទល្មើសនានាដែលបានកើតឡើងនៅក្នុងមូលដ្ឋានក្នុងខេត្តកំពង់ឆ្នាំង ជាក់ស្តែងបានបង្រ្កាបបទល្មើសជលផល ១៣២ករណី មានរបាំងស្បៃមុង២៨៤កន្លែង លូស្បៃមុង២៩៤លូ របាំងសាច់អួន ចំនួន២២៥កន្លែង លូសាច់អួន ៣១៤លូ សម្រាស់១៧៧កន្លែង និង ចាក់លែងកូនត្រីក្នុងដែន នេសាទបាន១៥៧០គីឡូក្រាម។
ជាមួយគ្នានេះលោក អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង បានមានប្រសាសន៍ថា ការប្រារព្ធពិធីលែងកូនត្រីពូជ គឺដើម្បីបំផុសមហាជនឱ្យមានស្មារតីចូលរួមការពារ អភិរក្ស និងអភិវឌ្ឍន៍ធនធានជលផលឱ្យមានភាពប្រសើរឡើង ស្របទៅតាមគោល នយោបាយរបស់រាជរដ្ឋាភិបាល កម្មវិធីកំណែ ទម្រង់វិស័យជលផល ដោយបានលុបឡូត៍នេសាទទាំងអស់ ហើយបានប្រគល់សិទ្ធិអំណាចទៅឱ្យសហគមន៍គ្រប់គ្រង និងរៀបចំផែនការសម្រាប់អភិវឌ្ឍន៍មូលដ្ឋានរបស់ខ្លួន ។
លោក អ៊ុក រ៉ាប៊ុន បានគូសបញ្ជាក់ថា ដើម្បីធានាបាននូវនិរន្តរភាពធនធានជលផល អាជ្ញាធរមន្រ្តីជំនាញ ត្រូវមានភារកិច្ចធ្វើការផ្សព្វផ្សាយច្បាប់ស្តីពីជលផល លិខិតបទដ្ឋានគតិយុត្តនានា ជូនដល់ប្រជាពលរដ្ឋឲ្យបានទូលំទូលាយ ត្រូវធ្វើការបង្ក្រាបបទល្មើសនេសាទឲ្យមានប្រសិទ្ធិភាព ដោយធ្វើការសហការជាមួយអាជ្ញាធរមូលដ្ឋាន កងកម្លាំង និងមន្ទីរពាក់ព័ន្ធ។ ធ្វើការបំផុសការអភិវឌ្ឍន៍ វារីវប្បកម្ម ពង្រឹងសមត្ថភាពដល់មន្រ្តីជំនាញ សហគមន៍នេសាទដែល បានបង្កើតរួចហើយឲ្យបានរឹងមាំ។ ត្រូវចាត់វិធានការ លើជនល្មើសបំផ្លាញព្រៃលិចទឹក និងរក្សាព្រៃលិចទឹកឲ្យបានគង់វង្ស ជាពិសេសគឺធ្វើការទប់ស្កាត់ និងអំពាវនាវដល់បងប្អូនកុំឲ្យធ្វើការនេសាទខុសច្បាប់ ដែលនាំឲ្យ វិនាសពូជត្រីទាំងស្រុងនាពេលអនាគត។ ការអភិវឌ្ឍន៍ប្រកបដោយចីរភាពគឺជាការធ្វើឱ្យមានការផ្លាស់ប្តូរជាវិជ្ជមានក្នុងពេលបច្ចុប្បន្ន ដោយមិនបង្កឲ្យមានវិនាសកម្មដល់ថ្ងៃអនាគត។ ថ្ងៃនេះយើងបានបំពេញបន្ថែមឱ្យទៅធម្មជាតិវិញ ក្នុងគោលបំណងស្តារតុល្យភាពរវាងការអភិវឌ្ឍន៍និងការអភិរក្ស តាមរយៈការធានានិរន្តរភាព នៃជីវៈចម្រុះដើម្បីចីរភាពប្រព័ន្ធអេកូឡូហ្ស៊ី៕
ដោយ ÷ ដារ៉ាស្រ៊ុន
