ឃាត់ខ្លួនបុរសម្នាក់ឈ្មោះ មែន ភាន់ ពាក់ព័ន្ធការឈូសឆាយដីព្រៃឈើ ហ៊ុំព័ទ្ធស្ថានីយ៍ផ្សព្វផ្សាយ និងស្ដារព្រៃឈើអូរសំពង់ -ភ្នំសេវ៉ា

ខេត្តកំពង់ធំ ៖ កាលពីវេលាម៉ោង១១:៣០នាទីថ្ងៃត្រង់ នៅថ្ងៃទី១៤ ខែកក្កដា ឆ្នាំ២០២២ លោក តឹប ញតា នាយអធិការខាងជើងបឹងទន្លេសាប ដឹកនាំកម្លាំងចម្រុះ ដោយមានការចូលរួមលោកប្រធានមន្ទីរពាក់ព័ន្ធ អភិបាលស្រុកសន្ទុក ក្រោមការសម្របសម្រួលព្រះរាជអាជ្ញាអមសាលាដំបូងខេត្តកំពង់ធំ បានធ្វើការឃាត់ខ្លួនជនសង្ស័យម្នាក់ ឈ្មោះ មែន ភាន់ អាយុ៥៧ ឆ្នាំ ពាក់ព័ន្ធការដុត កាប់រាន ឈូសឆាយ ហ៊ុំព័ទ្ធដីស្ថានីយ៍ផ្សព្វផ្សាយ និងស្តារព្រៃឈើអូរសំពង់-ភ្នំសេវា ដើម្បីវាតទី យកដីធ្វើកម្មសិទ្ធិ ស្ថិតក្នុងភូមិសាស្រ្ត ភូមិអូរក្រពើ ឃុំបឹងល្វា ស្រុកសន្ទុក ខេត្តកំពង់ធំ។

តាមប្រភពពីសមត្ថកិច្ចអធិការខាងជើងបឹងទន្លេសាបឲ្យដឹងថា ឈ្មោះ មែន ភាន់ នេះខណ្ឌរដ្ឋបាលព្រៃឈើកំពង់ធំ បានចងក្រងសំណុំរឿងទៅតុលាការខេត្តកំពង់ធំ យោងតាមដីកាអម លេខ៥០១ ខរព-កឆ របស់ខណ្ឌរដ្ឋបាលព្រៃឈើកំពង់ធំ កាលពីថ្ងៃទី ៣១ ខែសីហា ឆ្នាំ២០២១ មកដល់ពេលនេះជននេះ បាននាំបក្សពួកមកសម្អាតដីស្ថានីយ និងយកកូនកៅស៊ូ មកដាក់ក្នុងស្ថានីយ ដោយបង្កើតជាថ្នាលតម្កល់កូនកៅស៊ូចំនួន១០.០០០ដើម ទៅ១៥.០០០ដើម ។

ប្រភពដដែលបន្ថែមទៀតថា បុគ្គលឈ្មោះ មែន ភាន់ និងបក្ខពួក បានកាប់ រាន ដុតឈូសឆាយ និង ហ៊ុមព័ទ្ធដីព្រៃឈើដើម្បីវាតយកដីធ្វើកម្មសិទ្ធិ នៅតំបន់អូរសំពង់ ក្នុងស្ថានីយផ្សព្វផ្សាយ និង ស្ដារព្រៃឈើអូរសំពង់-ភ្នំសេវា អស់ប្រមាណ ជាង៤០ហិតា។ ប្រភពផ្សេងទៀតបានបង្ហើបឱ្យដឹងថាពាក់ព័ន្ធករណីខាងលើនេះគឺមាន អ្នកគាំទ្រនៅពីក្រោយខ្នងបង្អែក ជាបុគ្គលមន្ត្រីនគរបាលផ្នែកសេដ្ឋកិច្ច និងមន្ត្រីកងរាជអាវុធហត្ថផងដែរ ទើបជននេះហ៊ានប្រព្រឹត្តទង្វើល្មើសបែបនេះ។

នេះគ្រាន់តែជាប្រភពម្ខាងផ្ដល់ឲ្យតែប៉ុណ្ណោះ ដោយ ឡែកបច្ចុប្បន្នជនសង្ស័យឈ្មោះ មែន ភាន់ កំពុងនាំយកទៅសាកសួរនៅស្នងការខេត្តកំពង់ធំ ដើម្បី ចងក្រងសំណុំរឿងបញ្ជូនទៅតុលាការ និងស្រាវជ្រាវរកបក្សពួកបន្ថែម ដើម្បីឃាត់ខ្លួនតាមនីតិវិធីបន្ត។

គួរបញ្ជាក់ផងដែរក្នុងប្រតិបត្តការណ៍បង្ក្រាបនោះសមត្ថកិច្ចបានដកហូតវត្ថុតាងរួមមាន ៖ កូនកៅស៊ូមិនទាន់ដាំ ចំនួនជិត២ពាន់ដើម , គ្រឿងចក្រកែច្នៃជាមធ្យោបាយសម្រាប់បាញ់ថ្នាំ១គ្រឿង , ម៉ាស៊ីនកាត់ស្មៅ១គ្រឿង, ធុងបាញ់ថ្នាំ១ និងវត្ថុតាងមួយចំនួនទៀតផងដែរ៕

ដោយ ÷ វិបុល