ខេត្តមណ្ឌលគិរី ៖ នៅយប់ថ្ងៃទី១០ ខែកក្កដា ឆ្នាំ២០២២ កម្លាំងនគរបាលអធិការដ្ឋាន នគរបាលស្រុកកែវសីមា ឃាត់ចាប់បានរថយន្តដឹកគ្រឿងឈើ មានបំណងនាំចេញ ក៏ត្រូវបានស្ទាក់ចាប់បានតែរថយន្ត ប៉ុន្តែអ្នកបើកបរបានរត់គេចខ្លួនបាត់។
ប្រតិបត្តការណ៍បង្ក្រាបបាននេះដោយមានការចូលរួមពីកម្លាំងស្នងការដ្ឋាននគរបាលខេត្តមណ្ឌលគិរី សហការជាមួយកម្លាំងអធិការដ្ឋាននគរបាលស្រុកកែវសីមា និងកម្លាំងប៉ុស្តិ៍ស្រែខ្ទុម បានចាប់ឃាត់រថយន្តដឹកឈើកែច្នៃ ១គ្រឿង ដឹកឈើប្រភេទគ្រោងទ្វារ និងបង្អួចដែលគ្មានច្បាប់អនុញ្ញាត។
វត្ថុតាងរួមមាន៖ ១. រថយន្ត ១គ្រឿង ម៉ាកស្ការិច ពណ៌ទឹកប្រាក់ ពាក់ស្លាកលេខ ភ្នំពេញ 2AQ-8865, ២. ទ្វារប្រភេទសុក្រំ ចំនួន ៧សន្លឹក, ៣. គ្រោងទ្វារ ចំនួន ២៧ដើម, ៤. គ្រែមុង ចំនួន ១គ្រឿង, រីឯអ្នកបើកបររថយន្តបានរត់គេចខ្លួនបាត់។
បច្ចុប្បន្ន វត្ថុតាងខាងលើត្រូវបានកម្លាំងប៉ុស្តិ៍នគរបាលរដ្ឋបាលស្រែខ្ទុម ប្រគល់ជូនទៅទីស្នាក់ការកណ្ដាលដែនអភិរក្សកែវសីមា ដើម្បីរក្សាទុក និងបន្តអនុវត្តតាមនីតិវិធី។
មហាជនបានលើកឡើងថាទោះបីកម្លាំងនគរបាលសហការជាមួយនិងស្ថាប័នជំនាញផ្សេងៗប្រឹងប្រែងដើម្បីបង្ក្រាបបទល្មើសនៃការដឹកជញ្ជូនឈើខុសច្បាប់យ៉ាងណាក៏ដោយ ក៏ពួកឈ្មួញនៅតែមានល្បិចកលនិងប្រើប្រាស់គ្រប់រូបភាពដើម្បីនាំចេញឈើចេញជារហូត៕
ដោយ ÷ វិបុល
