ខេត្តបាត់ដំបង ÷ នៅថ្ងៃសុក្រ ៣កើតខែអាសាឍឆ្នាំខាលចត្វាស័ក ព.ស.២៥៦៦ ត្រូវនឹងថ្ងៃទី ០១ ខែ កក្កដា ឆ្នាំ ២០២២ អនុវត្តតាមបទបញ្ជាដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបងនៅចំណុចគោលដៅចរាចរណ៍ ភូមិបឹងរាំង ឃុំបឹងរាំង ស្រុកកំរៀង ខេត្តបាត់ដំបង វេលាម៉ោងប្រមាណ ១២និង០០នាទី នគរបាលស្រុកកំរៀង ដែលមានលោកវរសេនីយ៍ទោ វេ គឹមចត់ អធិការនគរបាលស្រុក បានដឹកនាំកម្លាំងផ្នែកជំនាញឃាត់រថយន្តចំនួន០១គ្រឿង ម៉ាកសាំយ៉ុងពណ៍ទឹកប្រាក់ពាក់ស្លាកលេខកំពង់ចាម2A-0087 បើកបរដោយឈ្មោះ សុខ ចាន់ ភេទប្រុស អាយុ៣៤ឆ្នាំ រស់នៅភូមិប្រគាប ឃុំរូងជ្រៃ ស្រុកថ្មគោល ខេត្តបាត់ដំបង ដោយបានត្រួតពិនិត្យលើរថយន្តឃើញមានប្រហិតចម្រុះខូចគុណភាពប្រមាណជាង២,០០០គីឡូក្រាមដែលផ្ទុកពេញរថយន្តចេញពីប្រទេសថៃតាមច្រកអន្តរជាតិដូង ស្រុកកំរៀង ខេត្តបាត់ដំបង។
នៅពេលនេះសមត្ថកិច្ចនគរបាលស្រុកបានបញ្ជូនអ្នកបើកបរ រថយន្ត និងប្រហិតចម្រុះទាំងនោះមកកាន់ការិយាល័យជំនាញនៅស្នងការដ្ឋានដើម្បីអនុវត្តបន្តតាមនីតិវិធីច្បាប់។
មហាជនដាក់ការសង្ស័យថាប្រហែលជាមានការឃុបឃិតសូកលុយក្រោមតុរបស់ឈ្មួញរកស៊ីបទល្មើសជាមួយសមត្ថកិច្ចគយ នគបាលប្រចាំការច្រកព្រំដែនហើយ ទើបរថយន្តដឹកប្រហិតខូចគុណភាពចូលដល់ក្នុងស្រុកបាន។
នៅព្រឹកថ្ងៃទី០២ ០៧ ២០២២ អង្គភាពយើងបានស្វែងរកបំភ្លឺពីមន្ត្រីប្រចាំការនៅច្រកព្រំដែនខាងលើ តែមិនអាចទំនាក់ទំនងបាន ទោះយ៉ាងណាអង្គភាពយើងខ្ញុំនិងរងចាំការបំភ្លឺរៀងរាងម៉ោងធ្វើការ៕
ដោយ ÷ គង់ សឿន
