ខេត្តកែប÷ អនុវត្តតាមបញ្ជាផ្ទាល់ពីលោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្តកែប នៅវេលាម៉ោង៦និង៤០នាទីល្ងាចថ្ងៃទី១៣ ខែឧសភា ឆ្នាំ២០២២ កម្លាំងនគរបាលការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តកែប បានស៊ើបអង្កេតចុះបង្ក្រាបមុខសញ្ញាជួញដូរ និងប្រើប្រាស់ដោយខុសច្បាប់នូវសារធាតុញៀន ចំនួន១ករណី នៅចំណុចសួនច្បារមុខសាលាខេត្តកែបក្នុងភូមិកែប សង្កាត់កែប ក្រុង/ខេត្តកែប ។
ប្រតិបត្តិការបង្ក្រាបខាងលើឃាត់ខ្លួនជនសង្ស័យម្នាក់ឈ្មោះ ទូច ចាន់ទី ភេទប្រុស អាយុ២៩ឆ្នាំ រស់នៅភូមិចំការចេក ឃុំពងទឹក ស្រុកដំណាក់ចង្អើរ ខេត្តកែប និងដកហូតវត្ថុតាងមួយចំនួនរួមមាន៖ ម្សៅក្រាមព៌ណសថ្លាចំនួន១កញ្ចប់ ទម្ងន់១២.៤២ក្រាម ថ្លឹងទាំងថង់,ម៉ូតូចំនួន១គ្រឿង ,ទូរសព្ទចំនួន១គ្រឿងនិង ជញ្ជីងសម្រាប់ថ្លឹងថ្នាំញៀន១គ្រឿង រួមទាំងសម្ភារៈវេចខ្ចប់មួយចំនួន។
ក្រោយឃាត់ខ្លួនជនសង្ស័យរួមទាំងវត្ថុតាងកម្លាំងសមត្ថកិច្ចយើងបានបញ្ជូនមកស្នងការដ្ឋាននគរបាលខេត្ត ដើម្បីបន្តនីតិវិធី សាកសួរ និងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការបន្តតាមនីតិវិធីច្បាប់៕
ប្រភព ÷ស្នងការនគរបាលខេត្តកែប
