បាត់ដំបង ៖ ផ្សាររាត្រីក្រុងបាត់ដំបងខេត្តបាត់ដំបង តម្លៃ៣០ម៉ឺនដុល្លារ ដែលជាហិរញ្ញប្បទាន ឥតសំណងពីរដ្ឋាភិបាលជប៉ុន ត្រូវបានសម្ពោធដាក់ឱ្យប្រើប្រាស់ហើយ នៅព្រឹកថ្ងៃទី៣០ ខែសីហា ឆ្នាំ២០១៨ ។ ពិធីនេះធ្វើឡើងក្រោមអធិបតីភាពលោក ងួន រតនៈអភិបាលខេត្តបាត់ដំបង និងមានការចូលរួមពីលោក វង្ស ពិសិទ្ធ នាយកគម្រោង និងជាអគ្គនាយករង នៃក្រសួងសាធារណការនិងដឹកជញ្ជូននិងលោក អ៊ុក នីដា តំណាងធនាគារអភិវឌ្ឍន៍អាស៊ី(ADB)។
បើតាមការឱ្យដឹងពីរដ្ឋបាលខេត្តបាត់ដំបងការកសាងផ្សាររាត្រីថ្មីនៅក្នុងមហាអនុតំបន់ទន្លេមេគង្គនេះគឺជាគម្រោងអភិវឌ្ឍន៍ក្រុងរបៀងសម្រាប់លើកស្ទួយជីវភាពរស់នៅរបស់ប្រជាពលរដ្ឋនៅតាមអនុតំបន់ទន្លេមេគង្គ-ខេត្តបាត់ដំបងដែលត្រូវបានផ្តល់ហិរញ្ញប្បទានឥតសំណងដោយមូលនិធិជប៉ុន។
ផ្សាររាត្រីថ្មីនេះមានទីតាំងស្ថិតនៅក្នុងសង្កាត់ស្វាយប៉ោនិងនៅចំកណ្តាលក្រុងបាត់ដំបងពោលគឺនៅចន្លោះរវាងសាលាខេត្តនិងដងស្ទឹងសង្កែ។
គម្រោងនេះត្រូវបានអនុម័តនៅថ្ងៃទី២១ខែឧសភាឆ្នាំ២០១៣ដែលរយៈពេលសាងសង់គិតចាប់តាំងពីខែសីហាឆ្នាំ២០១៧រហូតដល់ខែមេសាឆ្នាំ២០១៨នៅលើទំហំផ្ទៃដី៣០៦៤ម៉ែត្រក្រឡា។ផ្សាររាត្រីនេះនឹងត្រូវគ្រប់គ្រងដោយគណៈកម្មាធិការគ្រប់គ្រងផ្សារដែលដឹកនាំដោយអភិបាលក្រុង។
រដ្ឋបាលខេត្តបានឱ្យដឹងទៀតថាគម្រោងនេះមានគោលបំណងសាកល្បងក្នុងការអភិវឌ្ឍទីផ្សារហើយជាវិធីសាស្រ្តមួយដើម្បីលើកស្ទួយជីវភាពរស់នៅរបស់ប្រជាជនរស់នៅតាមទន្លេមេគង្គ។ក្រុមអាជីវករផ្សារក្រីក្រមានចំនួន១៥២នាក់ក្នុងនោះស្រីមាន១៣៧នាក់ដែលត្រូវបានចងក្រងជាសមាគមអាជីវករផ្សារដែលគ្រប់គ្រងដោយគណៈកម្មការគ្រប់គ្រងផ្សាររាត្រី។អាជីវករទាំងនេះក៏ទទួលបានការបណ្តុះបណ្តាលនិងទទួលបានថវិកាសម្រាប់អាជីវកម្មរបស់ពួកគាត់ដែលគាំទ្រដោយគម្រោងនេះផងដែរ៕
ដោយ ៖ ចិត្រា
