ភ្នំពេញ៖ សម្ដេចនាយករដ្ឋមន្រ្តី ហ៊ុន សែន កាលពីថ្ងៃទី២៨ ខែសីហា ២០១៨ បានចារយល់ព្រមតាមសំណើរបស់ក្រសួងមហាផ្ទៃ ដើម្បីសិក្សាលទ្ធភាពរៀបចំបង្កើតខេត្តថ្មីចំនួន២ ហើយ។ គម្រោងសិក្សាលទ្ធភាពបង្កើតខេត្តថ្មីទាំងពីរនោះ គឺទីមួយ ការសិក្សាលទ្ធភាពបង្កើតខេត្តថ្មីមួយ ដោយបំបែកចេញពីខេត្តកណ្ដាល និងទីពីរ ការសិក្សាលទ្ធភាពក្នុងការបង្កើតខេត្តថ្មីមួយទៀត ដោយពិនិត្យលើកត្តាភូមិសាស្រ្ត និងប្រជាសាស្រ្តរបស់ស្រុកកោះញែក នៃខេត្តមណ្ឌលគិរី និងស្រុកលំផាត់ នៃខេត្តរតនគិរី។
ចំណារយល់ព្រមរបស់សម្ដេច ហ៊ុន សែន បានធ្វើឡើងលើលិខិតស្នើសុំគោលការណ៍អនុញ្ញាតមួយរបស់ក្រសួងមហាផ្ទៃ ដែលធ្វើឡើងកាលពីថ្ងៃទី២៧ ខែសីហា ២០១៨ កន្លងទៅ។ ក្នុងលិខិតនោះ បញ្ជាក់ថា ក្នុងករណីសម្ដេចនាយករដ្ឋមន្រ្តីឯកភាពជាគោលការណ៍ហើយ ក្រសួងមហាផ្ទៃនឹងចាត់មន្រ្តីបច្ចេកទេស ដើម្បីសហការជាមួយក្រសួង និងខេត្តពាក់ព័ន្ធ ចុះធ្វើការសិក្សាស្រាវជ្រាវជាក់ស្ដែង ដើម្បីរាយការណ៍សុំយោបល់ដឹកនាំជាបន្ដបន្ទាប់ពីសម្ដេចនាយករដ្ឋមន្រ្តី។
ក្នុងលិខិតនោះ បញ្ជាក់ទៀតថា ការរៀបចំសិក្សាលទ្ធភាពបង្កើតខេត្តនេះ នឹងធ្វើឲ្យចប់សព្វគ្រប់នៅខែមករា ឆ្នាំ២០១៩ ដើម្បីទុកពេលវេលាសមស្របសម្រាប់រាជរដ្ឋាភិបាលកំណត់ចំនួនអាសនៈក្រុមប្រឹក្សារាជធានី ខេត្ត ក្រុង ស្រុក ខណ្ឌ សម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌអាណត្តិទី៣ ដែលតាមអាណត្តិកំណត់ក្នុងច្បាប់ គឺក្នុងអំឡុងខែឧសភា ឆ្នាំ២០១៩ ខាងមុខ៕
អត្ថបទទាក់ទង៖ ក្រសួងមហាផ្ទៃ ស្នើបង្កើតខេត្តថ្មីចំនួន២
ដោយ៖ សំណាង
