ខេត្តកំពង់ធំ ÷ នៅរសៀលថ្ងៃទី១២ ខែមេសាឆ្នាំ ២០២២ រដ្ឋបាលខេត្តកំពង់ធំដឹកនាំដោយឯកឧត្តម សុខ ហៃ អភិបាលរង តំណាងឯកឧត្តម ងួន រតនៈ អភិបាលគណៈអភិបាលខេត្តកំពង់ធំ លោកជំទាវ ង៉ែត ណារីន ប្រធានមន្ទីរព័ត៌មានខេត្ត និងសហការី លោកមេបញ្ជាការ មេបញ្ជាការរងកងកម្លាំងទាំងបីប្រភេទ លោក/លោកស្រី ប្រធានមន្ទីរ នានាជុំវិញខេត្ត អភិបាល/អភិបាលរង ក្រុង/ស្រុក បានអញ្ជើញជួបសំណេះសំណាលសួរសុខទុក្ខនិងស្វែងយល់ពីចំណុចខ្វះខាត រវាងអ្នកសារព័ត៌មាន និងអជ្ញាធរមូលដ្ឋាន ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ជាមួយបងប្អូនអ្នកសារព័ត៌មានក្នុងខេត្តកំពង់ធំ ។
បន្ទាប់ពីលោកជំទាវ ង៉ែត ណារីន បានអានរបាយការណ៍ស្វាគមន៍នឹងរាយការណ៍សង្ខេបពីសកម្មភាពការងារលើវិស័យសារព័ត៌មាននៅមន្ទីរព័ត៌មានខេត្តកំពង់ធំរួចមក ។
មានបងប្អូនអ្នកសារព័ត៌មានបានលើកឡើងអំពីសំណួរ និងបញ្ហាប្រឈមនានារវាងអ្នកសារព័ត៌មាន ក្នុងពេលចុះយកព័ត៌មាននិងបញ្ហាផ្សេងៗទៀត ហើយក៏មានការបកស្រាយពីគណះអធិបតី និងស្ថាប័នជំនាញដើម្បីបានយល់ទាំងអស់គ្នា។
ក្នុងឱកាសនោះ ឯកឧត្ដម សុខ ហៃ អភិបាលរងខេត្ត បានថ្លែងអំណរគុណយ៉ាងជ្រាលជ្រៅចំពោះឯកឧត្តមលោកជំទាវ អស់លោក/លោកស្រីដែលបានចូលរួមក្នុងអង្គពិធីនេះពិសេសអ្នកសារព័ត៌មាននិងមន្ត្រីជំនាញ តាមបណ្ដាអង្គភាពរបស់ខ្លួន។ នោះសបញ្ជាក់ឲ្យឃើញពីការយកចិត្តទុកដាក់និងគិតគូររវាងអ្នកសារព័ត៌មានជាមួយអាជ្ញាធរមូលដ្ឋាន មន្ត្រីជំនាញ ដើម្បីឲ្យការអនុវត្តការងារទទួលបានជោគជ័យ។
ឯកឧត្តម សុខ ហៃ បានជំរុញឲ្យមន្ត្រីជំនាញ និងស្ថាប័នទាំងអស់ខិតខំនឹងយកចិត្តទុកដាក់ចុះពិនិត្យជាក់ស្តែងនៃករណីដែលកើតមានឡើងនៅតាម មូលដ្ឋានដែលខ្លួនទទួលខុសត្រូវនឹងពន្លឿនការដោះស្រាយនេះឲ្យបានទាន់ពេលវេលា ។
ឯកឧត្តមគណៈអធិបតីក៏បានសំណូមពរដល់អ្នកសារព័ត៌មានទាំងអស់អញ្ចើញមកចុះបញ្ជីឲ្យបានគ្រប់ៗគ្នា និងសំណូមពរឲ្យអ្នកសារព័ត៌មានទាំងអស់ មុននឹងចុះផ្សាយត្រូវស្វែងរកប្រភពឲ្យបានគ្រប់ជ្រុងជ្រោយមុននិងធ្វើការផ្សព្វផ្សាយតាមប្រព័ន្ធបច្ចេកវិទ្យារបស់ខ្លួន។
ជាចុងក្រោយឯកឧត្តមបានជូនពរដល់អ្នកសារព័ត៌មានទាំងអស់ក្នុងឱកាសបុណ្យចូលឆ្នាំថ្មីខាងមុខនេះ សូមទទួលបាននូវជោគជ័យសម្រាប់ឆ្នាំថ្មីទាំងអស់គ្នា៕
ដោយ ÷ អ៊ិស វីន
