ភ្នំពេញ ៖ ចូរស្វែងយល់ពីសហគមន៍អាស៊ានដូចតទៅ ក្នុងឆ្នាំ១៩៩៧ ថ្នាក់ដឹកនាំរដ្ឋសមាជិកអាស៊ានបានអនុម័តនូវចក្ខុវិស័យអាស៊ានឆ្នាំ២០២០ ក្នុងខួបលើកទី៣០ឆ្នាំថ្ងៃកំណើតអាស៊ាន ដែលបានប្រព្រឹត្តទៅនៅទីក្រុងគួឡាឡាំពួរ ប្រទេសម៉ាឡេស៊ី។
ចក្ខុវិស័យនេះ ដែលជាមធ្យោបាយមួយសម្រាប់បង្កើតសហគមន៍អាស៊ានតែមួយ បានមើលឃើញថា អាស៊ានបានប្រែក្លាយជាក្រុមនៃប្រជាជាតិដែលសម្លឹងឆ្ពោះទៅខាងក្រៅ (Outward Looking) រស់នៅក្នុងសន្តិភាព (Living in Peace) និងមានស្ថិរភាពនិងវឌ្ឍនភាព (Stability and Prosperity)។ ចក្ខុវិស័យអាស៊ានឆ្នាំ២០២០ បានបញ្ចូលផងដែរនូវខដែលចែងអំពីសន្តិភាព និងស្ថិរភាព (Peace and Stability) ភាពគ្មានអាវុធនុយក្លេអ៊ែរ (Being Nuclear-Free) សមាហរណកម្មសេដ្ឋកិច្ចកាន់តែជិតស្និទ្ធ (Closer Economic Integration) ការអភិវឌ្ឍមនុស្ស (Human Development) ការអភិវឌ្ឍប្រកបដោយចីរភាព (Sustainable Development) បេតិកភ័ណ្ឌវប្បធម៌ (Cultural Heritage) ភាពគ្មានគ្រឿងញៀន (Being Drug-Free) និងបរិស្ថាន (Environment)។
ចក្ខុវិស័យនេះក៏មានគោលបំណង «ឃើញអាស៊ានសម្លឹងឆ្ពោះទៅខាងក្រៅ បំពេញមុខងារស្នូល (Pivotal Role) ក្នុងវេទិកាអន្តរជាតិ និងជំរុញផលប្រយោជន៍រួមរបស់អាស៊ាន»។ ចក្ខុវិស័យនេះត្រូវបានទទួលស្គាល់ជាផ្លូវការនិងធ្វើឱ្យគ្រប់ជ្រុងជ្រោយ តាមរយៈកិច្ចព្រមព្រៀងទីក្រុងបាលី លើកទី២ ឆ្នាំ២០០៣ (Bali Concord II in 2003)។
សសរស្ដម្ភទាំងបីរបស់ សហគមន៍អាស៊ានតែមួយត្រូវបានបង្កើតឡើងលើ៖
១- សហគមន៍សន្តិសុខអាស៊ាន (ASEAN Security Community)
២- សហគមន៍សេដ្ឋកិច្ចអាស៊ាន (ASEAN Economic Community) និង
៣- សហគមន៍សង្គមវប្បធម៌អាស៊ាន (ASEAN Socio-Cultural Community)។ សហគមន៍អាស៊ាន ដែលពីដំបូងត្រូវបានគ្រោងថាត្រូវចាប់ផ្ដើមនៅឆ្នាំ២០២០ ត្រូវបានពង្រួញមកត្រឹមថ្ងៃទី៣១ ខែធ្នូ ឆ្នាំ២០១៥វិញ។ ការ ពង្រួញនេះត្រូវបានសម្រេចដោយប្រមុខរដ្ឋ និងប្រមុខរដ្ឋាភិបាលអាស៊ាន ក្នុងកិច្ចប្រជុំកំពូលអាស៊ានលើកទី១២ ដែលបានប្រព្រឹត្តទៅនៅទីក្រុងសេប៊ូ ប្រទេសហ្វ៊ីលីពីន នាឆ្នាំ២០០៧៕
ដោយ ៖ ចាន់ថារស្មី
