ខេត្តសៀមរាប÷ មន្រ្តីជំនាញក្នុងខេត្តសៀមរាបបានចុះទៅអប់រំណែនាំឱ្យលោកស្រី អេន ចរិយា ហៅអ្នកគ្រូ លី ធ្វើកិច្ចសន្យាបញ្ឈប់សកម្មភាពតាំងខ្លួនជាអ្នកមានបុណ្យ ជាព្រះនាងឥន្រ្ទទេវី និងការប្រតិបត្តិមិនត្រឹមត្រូវក្នុងព្រះពុទ្ធសាសនា ។
មន្រ្តីជំនាញពាក់ព័ន្ធដឹកនាំដោយលោក យុន លីណេ អភិបាល រងខេត្តសៀមរាប និងមន្ទីរធម្មការ និងសាសនា មន្ទីរវប្បធម៌ និងវិចិត្រសិល្បៈ អាជ្ញាធរក្រុងសៀមរាប អាជ្ញាធរជាតិអប្សរា ព្រះមេគណខេត្ត ចូលរួមផងនៅព្រឹកថ្ងៃទី២ ខែកុម្ភៈ ឆ្នាំ២០២៥ បានចុះទៅជួបលោកស្រី អេន ចរិយា ហៅ អ្នកគ្រូ លី មានទីលំនៅក្រុងតាខ្មៅ ខេត្តកណ្តាល ដែលកំពុងស្នាក់នៅវត្តអង្គរខាងជើង សង្កាត់នគរធំ ក្រុងសៀមរាប ខេត្តសៀមរាប ដើម្បីឱ្យធ្វើកិច្ចសន្យាបញ្ឈប់សកម្មភាពតាំងខ្លួនជាអ្នកមានបុណ្យ ជាព្រះនាងឥន្រ្ទទេវី និងការប្រតិបត្តិមិនត្រឹមត្រូវក្នុងព្រះពុទ្ធសាសនា។
ដោយនៅក្នុងកិច្ចសន្យានេះ លោកស្រី អេន ចរិយា ហៅអ្នកគ្រូលី បានធ្វើកិច្ចសន្យាបញ្ឈប់សកម្មភាពដែលតាំងខ្លួនជាអ្នកមានបុណ្យ ជាព្រះនាងឥន្ទ្រទេវី វីរៈក្សត្រីនាសម័យអង្គរ និងតាំងខ្លួនថា អ្នកមានបារមី ចូលសណ្ឋិត មានដូចខាងក្រោម ១.បញ្ឈប់សកម្មភាពប្រតិបត្តិសាសនាដែលមិនត្រឹមត្រូវ នៅតាមបណ្តាញសង្គមនិងទីសាធារណ: ២.យល់ព្រមលុបរូបភាព និងវីដេអូដែលខ្លួនបានបង្ហោះកន្លងមក ដែលតាំងខ្លួនជាអ្នកមានបុណ្យ និងព្រះនាងឥន្ទ្រទេវី ៣.ឈប់ធ្វើសកម្មភាពតាមប្រាសាទ និងសកម្មភាពតាំងខ្លួនជាអ្នកមានបុណ្យ ដែលលោកតាលោកយាយថ្វាយបង្គំថ្មីៗនេះ ៤.ឈប់ប្រើប្រាស់ភាសាគ្មានក្បួនច្បាប់ និង៥.ធ្វើវីដេអូសុំទោសជាសាធារណ: និងសន្យាមិនឱ្យមានសកម្មភាពបែបនេះបន្តទៀតឡើយ។
លោក យុន លីនណេ អភិបាលរងខេត្តសៀមរាប បានថ្លែងថា ការចុះមកនេះ គឺដើម្បីការពារពុទ្ធសាសនា ដែលជាសាសនារបស់រដ្ឋ ហើយអ្នកដែលមានជំនឿផ្សេងៗគ្នាមិនមានការហាមឃាត់ទេ ប៉ុន្តែកុំយកសាសនាមកលាយឡំ ធ្វើឲ្យប៉ះពាល់ដល់កិត្តិយសពុទ្ធសាសនាដែលជាសាសនារបស់រដ្ឋ ដោយយើងត្រូវថែរក្សាការពារព្រះពុទ្ធសាសនាឱ្យនៅផូផង់ដដែរ។
លោក វណ្ណ ប៊ុនណា ប្រធានមន្ទីរធម្មការ និងសាសនាខេត្តសៀមរាប ក៏បានលើកឡើងដែរថា នេះជាលើកទី២ហើយ សម្រាប់ករណីលោកស្រី អេន ចរិយា ហៅអ្នកគ្រូលី ដែលតាំងខ្លួនជាអ្នកមានបុណ្យ ជាព្រះនាងឥន្ទ្រទេវី វីរៈក្សត្រីនាសម័យអង្គរ ដោយកាលពីឆ្នាំ២០២៤ មានម្តងនៅរាជធានីភ្នំពេញ លើកទី២នេះ នៅវត្តអង្គរខាងជើងខេត្តសៀមរាប។ លោកបញ្ជាក់ថា បើសិនជាមានលើកទី៣អាជ្ញាធរនិងចាត់វិធានការតាមផ្លូវច្បាប់ ដោយឈប់មានធ្វើកិច្ចសន្យាទៀតហើយ។
សូមបញ្ជាក់ថា លោកស្រី អេន ចរិយា ហៅអ្នកគ្រូលី បានធ្វើសកម្មភាពតាំងខ្លួនជាអ្នកមានបុណ្យ ជាព្រះនាងឥន្ទ្រទេវី វីរៈក្សត្រីនាសម័យអង្គរ និងតាំងខ្លួនថាមានបារមី ចូលសណ្ឋិត ដែលឱ្យលោកតាលោកយាយ មានជំនឿហើយថ្វាយបង្គំគាត់ និងបានធ្វើសកម្មភាពបញ្ជូលសិល្បអាគមឱ្យទៅ លោកយាយលោកតា ទាំងនោះ គឺជាការខុសឆ្គង ។
ដោយ÷ ពន្លឺ
